• Eth Conselh Generau d’Aran e er Ajuntament de Vielha e Mijaran an hèt arribar ara conselhèra de cultura dera Generalitat ua prepausa elaborada conjuntament entà bastir un centre polivalent que pogue acuélher tot tipe d’activitats culturaus, hèires e congrèssi e que pogue esdevier un centre referent en matèria de lengua

• Era Val d’Aran ei des pògui, se non er unic, territòris de tota Catalunya que non compde damb un espaci a on poder amiar a tèrme activitat culturau e balhar supòrt ara creacion e ath nombrós teishit associatiu culturau aranés

• Er Ajuntament de Vielha e Mijaran a metut a disposicion ua parcèlla d’equipament municipau entà acuélher aguest equipament en centre de Vielha

Era sindica d’Aran, Maria Vergés, a hèt arribar ara conselhèra de Cultura dera Generalitat, Natàlia Garriga, dempús de diuèrses convèrses damb responsables d’aguest departament, ua prepausa tath bastiment d’un centre culturau ena Val d’Aran, concrètaments en Vielha, a on er Ajuntament de Vielha e Mijaran a cedit ua parcèlla tad aguest prètzhèt.

“Era Val d’Aran ei des pògui, se non er unic, territòri de Catalunya que non compde damb un espaci a on poder amiar a tèrme activitat culturau e balhar supòrt ara creacion e ath nombrós teishit associatiu culturau aranés, a despièch dera estreta vinculacion entre lengua e cultura que, en cas dera Val d’Aran, ei d’ua importància indiscutibla” afirmaue era sindica d’Aran, en tot híger que “ara grèu mancança d’un espaci culturau en nòste territòri, se hig tanben era critica situacion der Archiu Generau d’Aran, que presènte fòrça problèmes d’espaci e ubicacion”.

Eth bastiment d’un centre culturau en territòri ei ua demana istorica dera Val d’Aran e un ahèr que s’a trasladat damb anterioritat ara conselhèra de Cultura, atau coma as organismes pertinents.

Eth Conselh Generau d’Aran e er Ajuntament de Vielha e Mijaran an elaborat, de manèra conjunta, era prepausa tath bastiment d’aguest centre culturau, plaçat en ua parcèlla cedida peth consistòri en parcatge des militars, e que supausarie un equipament culturau polivalent de proximitat damb fòrça espacis destinadi a diferents ahèrs relacionadi damb era cultura e era lengua.

Era prepausa elaborada includís aules entà impartir corsi e talhèrs formatius de diuèrses tematiques entà un public ampli, un Centre der Aranés dedicat ara promocion e normalizacion dera lengua pròpria d’Aran, un espaci que lotjarà er Archiu Generau d’Aran, era bibliotèca, ua sala polivalenta entà actes escenicomusicaus configurable entà acuélher diferents actes e que que servirà tanben entà poder acuélher hèires e congrèssi, e un conjunt d’espacis en relacion entà exposicions e actes dubèrti.

“Aguest centre a estat concebut coma espaci culturau de proximitat e un esturment de coesion sociau a partir deth quau generar e consolidar procèssi de dinamizacion socioculturau” manifestaue er alcalde de Vielha, Juan Antonio Serrano, en tot híger que: “auem plantejat aguest centre culturau coma un espaci de dialòg e de trobada, un lòc a on dar cabuda ara cultura en totes es sues variants e a on es associacions e collectius poguen desvolopar es sòns projèctes”.

Ath delà, ena missiva enviada eth passat dijaus ara conselhèra Garriga, era sindica d’Aran apuntaue que “eth bastiment d’aguest centre serie ua oportunitat entà poder revertir era actuau situacion d’infrainversion qu’era Val d’Aran acumule enes darrèri dotze ans que, atau e coma reflectissen es donades deth departament d’Economia, se trape en -84%, e qu’en matèria de cultura a estat istoricaments fòrça escàs”.