Vielha, 18 d’abriu de 2019.- Eth Conselh Generau d’Aran acuelhec er acte d’afrairament entre era Val d’Aran e era Val de Aller en Astúrias, en que participèren era conselhèra de Torisme d’Aran, Anna Díaz, eth baile deth municipi de Aller, David Moreno Bobela, e eth director comerciau de Baqueira Beret, Xavier Ubeira.

Era val de Aller, qu’a quauques similituds damb era Val de Aran, compde damb era atraccion dera estacion d’esquí de Fuentes de Invierno qu’a supausat un espectacular creishement deth sector toristic enes darrèri ans, e ua importanta aufèrta de païsatge, senderisme, rotes de montanha, espòrts d’iuèrn e ua rica gastronomia, ath delà deth Camin de Sant Jaume Allerano, anciana Rota de Peregrinación. Eth municipi de Aller organize damb era collaboracion dera Conselheria d’Emplec, Industria e Torisme deth Principat d’Astúrias era Hèira monografica dedicada as espòrts de nhèu e de montanha Nevaria, que s’a convertit ena prumèra hèira d’aguestes caracteristiques en nòrd d’Espanha.

Damb er afrairament entre es vals s’establís ua relacion que permeterà desvolopar ua collaboracion establa, expliquèc Anna Díaz.

Pendent uns dies, eth baile deth municipi de Aller e era tecnica de Torisme Celia Villar visiten era Val d’Aran entà conéisher era estacion d’esquí de BaquEira Beret e mantier amassades damb empresaris deth sector toristic aranés. Cau destacar qu’eth concejo de Aller a trauès deth programa Aller Adictos (#AllerAdictos) comercialize paquets toristics damb descompdes qu’includissen sojorns ena Val d’Aran e Baqueira Beret.

Era conselhèra de Torisme d’Aran, Anna Díaz, afirmèc qu’era preséncia contunhada de Torisme Val d’Aran amassa damb Baqueira Beret ena hèira Nevaria, e ara aguest afrairament, servís ta fidelizar encara mès se cap as nòsti visitants asturians que son grani clients dera Val d’Aran sustot en iuèrn.