Era Val d’Aran, Castelldefells, Lloret de Mar e Salou son es destinacions toristiques catalanes que hèn part deth nau hilat

Vielha, 12 d’octobre de 2018.- Era conselhèra de Torisme d’Aran, Anna Díaz, a assistit ara reünion convocada pera ministra d’Indústria, Comèrç e Torisme, Reyes Maroto, de presentacion dera Xarxa de Destinacions Turístiques Intel·ligents (DTI), ara que s’an aderit setanta destinacions des dètz-e-sèt comunitats autonòmes.

Era Xarxa de Destinacions Turístiques Intel·ligents compde damb zònes que s’includissen laguens d’un nau modèl toristic que junh concèptes coma era sostenibilitat, era accessibilitat, era governança public-privada, era innovacion e era tecnologica entà hèr frònt as rèptes toristics deth present, que permeterà conéisher quines son es fortaleses d’aguestes destinacions, crear sinergies entre eres, e trabalhar damb un punt de vist de coesion territoriau e d’integracion des destinacions en tot utilizar es naues tecnologies. Aguest projècte s’enquadre laguens deth Plan Nacionau e Integrau de Torisme.

Eth projècte, que compde damb era collaboracion de Segittur e de Red.es entara dotacion de hons, se base en assessorament, recèrca de finançament e de solucions, tant tecnologiques coma d’estrategia.

Entara conselhèra de Torisme d’Aran, Anna Díaz, entrar a hèr part d’aguest nau hilat signifique poder accedir a totes es donades d’aucupacion toristica qu’emplegue eth ministèri de Torisme d’Espanha, que permeterà a Torisme Val d’Aran afinar es estrategies entà melhorar era aufèrta toristica dera Val d’Aran e aufrir as sòcis de Foment Torisme Val d’Aran donades complètes per çò qu’ei d’aucupacion toristica, atau coma méter era valor e dar visibilitat as esfòrci publics e privadi deth sector toristic coma motor economic dera Val d’Aran. Anna Díaz, a arrebrembat qu’era Val d’Aran hè ja 3 ans qu’en collaboracion damb Segittur participe en programa de destinacions toristiques intelligentes de Montanha.

Anna Díaz a manifestat que damb era adesion ara Xarxa de Destinacions Turístiques Intel·ligents, era Val d’Aran contunhe d’auançar entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, çò que contribuís a qu’Aran sigue ua destinacion toristica basada en respècte e era promocion deth sòn ric auviatge e dera sua cultura, amassa damb eth miei ambient e era responsabilitat.

Era ministra Reyes Maroto a destacat qu’agest hilat ei ua escomesa entà un element clau dera estrategia de Destinacions Toristiques Intelligentes entà sostier era conversion des destinacions, favorir era coesion, er escambi de bones practiques e eth profitament de sinergies entre es destinacions e eth sector.

Cau arrebrembar qu’era Val d’Aran compde damb era certificacion Biosphere, Smart Destination, e eth sagèth de destinacion de torisme familhau e trabalhe ena reconeishença de païsatge culturau agropastorau per part dera Unesco, laguens eth projècte dera candidatura dera Val d’Aran coma Auviatge dera Umanitat.