• Eth departament de Torisme deth Conselh Generau d’Aran a amiat a tèrme pendent es darrèri mesi un seguit d’accions, a nivèu nacionau e internacionau, a trauès de mieis de comunicacion, Tour Operadors e influencers entà promocionar era Val d’Aran, qu’an auut ua fòrça bona repercussion a nivèu de hilats sociaus e preséncia ena premsa

Foment Torisme Val d’Aran a amiat a tèrme pendent era primauera tot un seguit d’accions promocionaus entà dar a conéisher eth nòste territòri, autant a nivèu nacionau coma internacionau.

“Er airau de torisme amie a tèrme un gran trabalh de promocion dera Val d’Aran pendent tot er an, mès ei de besonh destacar es accions amiades a tèrme aguesti mesi d’abriu, mai e junh enes qu’auem acuelhut un elevat nombre de visites de jornalistes, Tour Operadors e influencers qu’an dat a conéisher es nombroses activitats de montanha que se pòden realizar en nòste territòri pendent era primauera e er ostiu, es nòsti paisatges, cultura e gastronomia”, explicaue eth vicesindic e conselhèr de Governacion, Innovacion, Economia e Torisme, Amador Marqués.

En aguesti mesi, s’an gravat reportatges entà mieis de comunicacion coma TVE sus era nòsta natura, cultura e gastronomia, mos an visitat grops de jornalistes alemands acompanhadi per membres dera Oficina Espanhòla deth Torisme (OET) entà promocionar era aufèrta de montanha e er encant des pòbles aranesi en mercat internacionau, e se publicarà tanben un reportatge en ua importanta revista deth Regne Unit sus era aufèrta dera bicicleta gravel, entre d´auti.

En mes de junh s’an acuelhut dus viatges damb  Tour Operadors internacionaus, un d’eri damb agents procedentes de païsi coma Índia, França, Polònia o Japon, que vengueren a trauès dera Agéncia Catalana de Torisme e eth Patronat de Torisme des Tèrres de Lhèida, especializadi en tipe de client premium. Er aute Tour Operador que mos a visitat, ère especializat en mercat britanic, damb especiau interès enes espòrts outdoor e era nòsta aufèrta gastronomica.

Atau madeish, pendent tota era primauera, auem acuelhut un elevat nombre d’influencers especializadi en viatges e ena promocion de destinacions toristiques, qu’an aportat un impacte fòrça positiu enes hilats sociaus damb es sòns contenguts gravadi ena Val d’Aran. Aguest impacte a repercutit positivament enes hilats oficiaus dera Val d’Aran, en tot superar eth compde oficiau en Instagram de torisme deth nòste territòri es 70.000 seguidors.

Totes aguestes actuacions s´enmarquen laguens deth Plan de Sostenibilitat Toristica dera Val d´Aran a on se contemple, laguens des sues linhes estrategiques tara promocion dera destinacion, era desestacionalizacion a traués de campanhes damb influencers e damb mercats internacionaus en tot prebotjar un modèu toristic restacat damb era sostenibilitat.