Era Val d’Aran supère es donades d’aucupacion prepandemiques en aguesta campanha d’ostiu

A despièch qu’es donades d’agost s’an mantengut fòrça similars as deth darrèr an abans dera pandèmia damb un 73’58%, eth mes de junhsèga d’enguan a viscut un 8% d’aument respècte a 2019 damb ua aucupacion deth 57,29%

Era Val d’Aran a finalizat eth mes d’agost en tot barrar ua campanha d’ostiu que supère es donades d’aucupacion des ans anteriors ara pandèmia. Enguan, era aucupacion pendent eth mes d’agost a estat d’un 73’58%, ua chifra fòrça similara ara de 2019, que siguec d’un 73’87%, totun eth mes de junhsèga a estat un 8% superior ara deth darrèr an abans dera Covid, arribant enguan ath 57,29% deuant deth 49,04% de 2019.

“Deth govèrn deth Conselh Generau d’Aran ençà èm plan satisfèts damb es donades obtengudes enguan ena campanha toristica d’ostiu, damb ues chifres superiors as d’abans dera pandèmia, en part gràcies a tot eth trabalh de promocion e dinamizacion toristica amiat a tèrme des de Foment Torisme Val d’Aran”, explicaue eth conselhèr d’Economia, Torisme e Promocion Economica, Juan Antonio Serrano, en tot híger que: “ath long d’aguesti mesi, era Val d’Aran a acuelhut un seguit de pròves esportives e activitats culturaus e familhars que mos placen coma ua destinacion de referéncia, e açò se reflectís ena aucupacion des establiments ostalèrs deth territòri”.

Per çò que hè as donades d’aucupacion des darrèri ans, er an passat s’artenheren ues donades de 84,06% en agost e 53,56% en junhsèga, e en 2020 era aucupacion siguec deth 77,21% en agost e 40,31% en junhsèga.

“Cau rebrembar qu’es donades des ans dera pandèmia non reflectissen ua realitat comparable ara actuau, pr’amor qu’en aqueri moments es restriccions sanitàries non permetien era mobilitat qu’enguan auem tornat a arténher e, per tant, eth torisme nacionau e locau aumentèc fòrça, en tot beneficiar-mos”, afirmaue eth conselhèr Serrano.

Un especiau impuls a auut enguan eth ciclisme en nòste territòri, un pilar plan important laguens des linhes estrategiques deth Plan de Sostenibilitat Toristica dera Val d’Aran, en tot potenciar er emplec dera bicicleta coma alternativa ath transpòrt tradicionau e era reclassificacion dera ofèrta ciclista, incorporant totes es modalitats: MTB, gravel, enduro, cicloturisme e ebike.

S’an implementat accions coma eth plaçament de sies estacions de neteja e servici de bicicletes, era senhalizacion de camins e rutes (rebrembam qu’Aran compde damb mès de 800 km de rotes ciclistes) e er establiment d’un minibus tà Beret damb remòlc entà bicicletes.

Per çò que hè as campings, enguan es donades an estat inferiors as d’auti ans, damb ua aucupacion deth 18,18% ena zòna d’acampada e un 45,61% enes bungalows pendent eth mes de junhsèga e un 37,64% ena zòna d’acampada e un 66,44% enes bungalows en agost. Aguest descens des donades pòt auer estat provocat pr’amor des condicions meteorologiques que mos an acompanhat pendent es darrères setmanes, damb prevision de tempestes e tronades lèu casi cada tarde.

D’un aute costat, dempús des dus ans de pandèmia, enguan s’a vist incrementat tanben eth nombre de toristes estrangèrs en Aran, frut des accions estrategiques enes que Foment Torisme Val d’Aran pòrte temps trabalhant a trauès de mieis de comunicacion especializadi, agéncies e influencers, especiaument enes mercats de França, Benelux e Alemanha. En aguest sens cau destacar qu’era internacionalizacion toristica a estat e ei era principau linha estrategica de trabalh de promocion dera destinacion e, a despièch que pendent es dus darrèri ans non s’a podut hèr promocion enes mercats internacionaus pr’amor dera situacion sanitària, dejà s’an recuperat es accions en aguest airau.