• Eth Conselh Generau d’Aran e es Ajuntaments municipaus an decidit, en tot auer en compde qu’era situacion sanitària actuau ei favorable, celebrar aguest octobre es hèires ramadères de Les, Salardú, Vielha e Bossòst en tot implementar es mesures preventives de besonh

Era setmana passada, eth conselhèr de Territòri, Paisatge e Gestion ambientau, Francés Bruna, s’amassèc damb es alcaldes e representants des municipis de Vielha e Mijaran, Naut Aran, Bossòst e Les entà acordar era realizacion des hèires ramadères d’enguan.

“Er an passat, per responsabilitat, autant eth govèrn deth Conselh coma es ajuntaments  decidirem qu’era melhor decision entath conjunt deth territòri ère anullar aguestes celebracions pr’amor dera pandemia e entà preservar era salut publica des aranesi e araneses” rebrembaue eth conselhèr Bruna, en tot híger que: “enguan, auent en compde qu’era situacion  epidemiologica actuau ei fòrça favorable en nòste territòri, auem decidit celebrar es tradicionaus hèires deth bestiar de Salardú, Les, Vielha e Bossòst, en tot implementar totes es mesures sanitàries de besonh e suprimint deth programa es esdejoars populars per motius de seguretat”.

Aguestes hèires auran lòc eth dia 6 d’octobre en Les, eth dia 7 en Salardú, eth dia 8 en Vielha e eth 30 d’octobre en Bossòst.

Entà qu’es ramadèrs/es poguen portar eth bestiar entàs hèires, ei de besonh qu’agen era preceptiua guida de transpòrt, que se pòt sollicitar telefonicament ath 973 64 18 01 o per corrèu electronic a cgriart@gencat.cat. Destacam qu’eth dia 8 d’octobre non se poiràn realizar es guides pr’amor qu’era sedença deth Conselh Generau d’Aran serà barrada ath public.