• Aué comence eth modul d’Accidents de Multiples Victimes e Atencion en Montanha d’aguest Màster, ua formacion que se realize damb era collaboracion deth Conselh Generau d’Aran a trauès des Pompièrs d’Aran, qu’aufrissen coneishements teorics e practics sus aguest airau

Era Val d’Aran torne a acuélher, un an mès, eth modul d’Accidents de Multiples Victimes e Atencion en Montanha deth Màster d’Atencion Pre-espitalària e Espitalària Urgent der Institut de Formacion Continua – IL3.

Ath torn d’ua ueitantia d’alumnes deth màster realizaràn, a compdar d’aué e enquia diuendres, aguest modul que se realize damb era collaboracion deth Conselh Generau d’Aran a trauès des Pompièrs d’Aran.

“Aguesta formacion se realize en nòste territòri de hè fòrça ans ençà e èm plan satisfèts de qu’eth nòste còs de Pompièrs pogue contribusir a formar a naui professionaus en airau des emergéncies damb eth sòn ampli coneishement de rescats en montanha e atencion en accidents damb multiples victimes” asseguraue era sindica d’Aran, Maria Vergés.

Ath long d’aguesti tres dies, es estudiants trabalharàn, en airau d’atencion en montanha, era manipulacion de materiau de rescat e manòbres de progression en terren tecnic e realizaràn practiques de seguretat en tot trabalhar damb er elicoptèr.

En airau d’accidents de multiples victimes, es Pompièrs les ensenharàn a realizar ua classificacion rapida der estat des victimes e ua bona traçabilitat e meteràn en practica tecniques de mobilizacin, inmobilizacion e manòbres de camilha.