En FITUR 2019 era Val d’Aran arrecep eth Prèmi “Melhor Viatge d’Aventura 2019” autrejat pera revista Oxigeno
Vielha, 24 de gèr de 2019.- Torisme Val d’Aran participe un an mès en FITUR era hèira internacionau deth torisme en Madrid que s’alongarà enquiath pròplèu 27 de gèr e qu’enguan arribe ara 39au edicion coma ua des hèires mès importantes deth sector a nivèu mondiau e coma referent deth mercat sud-american.
FITUR amasse 870 expositors procedenti de 165 païsi. Era Val d’Aran participe ena hèira en stand de Catalonha dera Agéncia Catalana de Torisme.
Era sostenibilitat, era especialización e era tecnologia son es protagonistes de FITUR 2019 damb ua aufèrta de nauta qualificacion orientada ara melhora dera gestion toristica, eth contacte professionau, era promocion des destinacions e es experiéncies deth viatgèr, qu’enguan presente ua naua seccion destinada ath torisme cinematografic.
Era conselhèra de Torisme d’Aran, Anna Díaz, a participat ena inauguracion deth stand de Catalonha en FITUR amassa damb eth secretari d’Enterpresa e Competitivitat, Joaquim Ferrer, eth director generau de Torisme, Octavi Bono, e eth director dera Agéncia Catalana de Torisme (ACT), David Font, entre d’auti.
Era conselhèra Anna Díaz, destaquèc un còp mès que “damb era implantacion deth Sistèma de Torisme Responsable e era obtencion deth certificat Biosphere, era Val d’Aran contunhe en tot auançar entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, aspèctes toti eri destacadi ena edicion de FITUR 2019, çò que contribuís a qu’era Val d’Aran sigue ua destinacion toristica basada en respècte e era promocion deth sòn ric auviatge e dera sua cultura amassa damb eth miei ambient e era responsabilitat “.
Anna Díaz, profitèc era visita en FITUR entà entrevistar-se damb eth baile deth municipi de Aller, David Moreno Bobela. Eth municipi de Aller en Astúrias organize era hèira monografica dedicada as espòrts de nhèu e de montanha Nevaria ena que participen Torisme Val d’Aran e Baqueira Beret. Era val de Aller, qu’a quauques similituds damb era Val d’Aran, compde damb era atraccion dera estacion d’esquí de Fuentes de Invierno qu’a supausat un espectacular creishement deth sector toristic enes darrèri ans, e ua importanta aufèrta de païsatge, senderisme, rotes de montanha, espòrts d’iuèrn e ua rica gastronomia, ath delà deth Camin de Santiago Allerano, anciana Rota de Peregrinación.
Ei per aguest motiu qu’eth baile e d’auti representants deth Concejo de Aller visitaràn era Val d’Aran era pròplèu primauera entà mantier un escambi d’experiéncies damb es responsables toristics e empresaris d’Aran.
Prèmi “Melhor Viatge d’Aventura 2019”
Era revista Oxigeno a liurat en marc de FITUR, es sòns prèmis ath “Melhor Viatge d’Aventura 2019” entà arreconéisher es destinacions e prepauses que combinen espòrt e natura mès atractius e innovadors entad aguest nau an. Sudafrica coma destinacion internacionau e era Val d’Aran coma destinacion nacionau arreceben aguest prèmi.
Eth prèmi ath Melhor Viatge Oxigeno 2019 en territòri nacionau a estat entara Val d’Aran. Ena sua avaloracion Oxigeno destaque “Qu’aguesta val atlantica deth Pirenèu semble especiuaments hèta entà gaudir dera natura en estat pur e des espòrts outdoor, tant en estiu coma en iuèrn. Era sua especiau orografia -ua val entornejada de montanhes damb tucs de mès de tres mil mètres e nhèu tot er an, es sòns bòsqui, es sòns verdi prats- son un terren ideau entà era practica der alpinisme, eth trekking, era biciclèta de montanha, rafting … E en iuèrn esquí aupin e de montanha, raquetes, mushing … S’a açò li somam era sua riquesa culturau, era sua singularitat idiomatica, eth sòn auviatge e era arquitectura des pòbles dera val, era sua rica gastronomia … Era Val d’Aran se hè ua destinacion imprescindibla entàs cercaires d'”Oxigeno”.