• Era sindica d’Aran, amassa damb eth conselhèr d’Economia, Torisme e Promocion Economica e representants de Foment Torisme Val d’Aran an estat presents aguesta setmana ena Hèira Internacionau de Torisme en Madrid, en tot promocionar Aran coma destinacion qu’apòste e trabalhe ena sostenibilitat e eth suenh as nòstes montanhes e ara nòsta singularitat e cultura

Era Hèira Internacionau de Torisme de Madrid (FITUR) se celèbre enguan entre es dies 19 e 23 de mai, e era sindica d’Aran, Maria Vergés, eth conselhèr d’Economia, Torisme e Promocion Economica, Josep Canut, e diuèrsi representants de Foment Torisme Val d’Aran an estat presents en aguest eveniment qu’ei era referéncia en sector internacionau deth torisme.

En aguesta hèira s’amassen mès d’onze mil empreses expositores d’un totau de 165 païsi e regions de diferents continents.

“Era Val d’Aran a estat present en FITUR en totes es sues edicions e entà nosati supause ua oportunitat fòrça important de poder promocionar eth nòste territòri de cara a naui mercats internacionaus e meter-mos en contacte damb eri entà cercar recorsi e èster presents en mès païsi”, afirmaue eth conselhèr Canut.

Pera sua part, era sindica d’Aran destacaue que: “eth compromís deth govèrn deth Conselh Generau d’Aran ei auançar enquia un torisme sostenible e respectuós damb eth nòste territòri, pr’amor d’açò  trabalham en Plan de Sostenibilitat Toristica, damb eth quau amiaram a tèrme ahèrs tant importants coma era mobilitat sostenible, eth contròl d’accèssi, era desestacionalizacion e diversificacion dera aufèrta toristica e era implementacion des naues tecnologies entà auançar enquia ua destinacion intelligenta”, e higie que: “dempús dera pandemia e era afectacion qu’a auut sus aguest sector, er airau de Torisme deth Conselh Generau ei centrat ena recuperacion economica dera Val d’Aran e ena campanha d’ostiu, que demoram que sigue encara melhor qu’era der an passat”.

Pendent era tarde d’ager, en recinte de FITUR, era sindica e eth conselhèr acompanhèren ath director deth Val d’Aran Walking Festival, que recebec eth Prèmi de Torisme Actiu 2021, e podèren conversar tanben damb eth conselhèr d’Empresa e Coneishement dera Generalitat de Catalunya, Ramon Tremosa, damb qui s’emplacèren a, tant lèu sigue format eth govèrn catalan, tractar es diuèrsi ahèrs d’interès entà Aran coma es JJOO d’iuèrn o eth desplegament dera competéncia e des recorsi de besonh en matèria de torisme.