• Ager era Val d’Aran se projectèc ath mon coma un des tres territòris mès avaloradi pera National Geographic Society

• Era conselhèra de Torisme, Comèrç e Consum d’Aran, Anna Díaz, arrecebec ager en Berlin era placa qu’acredite ara Val d’Aran coma ua des tres melhores destinacions Leadership deth mon

• Ena finau èren Aruba Tourism Authority (Aruba), Delaware North Yosemite (Estats Units) e era Val d’Aran.

• Aruba siguec eth territòri guanhador

Era conselhèra de Torisme, Comèrçe Consum d’Aran, Anna Díaz, (era treasau pera quèrra) arrecebent eth guerdon dera Val d’Aran agèr en Berlín

“Er hèt d’èster finalistes en Berlin entà obtier eth guerdon des prèmis World Legacy Awards, guerdons que se dan as destinacions, organizacions e empreses que trabalhen ena transformacion dera indústria toristica, en tot potenciar eth torisme sostenible ena categoria de Destination Leadership, ei un èxit entath conjunt deth pòble aranés” a manifestat eth sindic d’Aran, Carlos Barrera.

Barrera a soslinhat “aguest camin arreconeish qu’aguesti valors s’inicièren de forma internacionau en arténher en gèr deth 2014 era certificacion Biosphere Destination qu’autrege era UNESCO. Aguesta reconeishença mos a permetut presentar era nòsta candidatura ath guerdon dera National Geographic. Er hèt d’èster escuelhudi coma finalistes en concors de Singapor damb ua preseleccion d’entre 150 territòris toristics de tot eth mon ja siguec entà Aran un èxit, mès er hèt d’èster finalista ager en Berlin a estat sense dobte er èxit de projeccion mondiau dera Val d’Aran qu’enquiara jamès s’auie artenhut.”

“Des deth Conselh Generau d’Aran felicitam a Foment Torisme Val d’Aran peth prètzhèt de promocion toristica que hè. A toti es empresaris aranesi pera sua professionalitat e esperit innovador des sòns establiments e deth tracte professionau que dispensen as sòns clients. Ara estacion aranesa de Baqueira Beret pera sua contunha politica d’inversion, modernizacion des sues installacions e peth gran respècte e integracion ar entorn deth conjunt dera estacion. Tanben felicitam a toti es vesins d’Aran qu’a titòl individuau e de forma quotidiana velhen pera excellenta conservacion deth nòste patrimòni, e evidentaments a totes es Administracions araneses implicades en garantir era pervivència de toti es valors que hèn meritòria ara Val d’Aran de poder auer estat finalista d’aguest guerdon de territòri Destination Leadership” a hijut eth sindic d’Aran, Carlos Barrera.