• Eth trabalh de promocion toristica amiat a tèrme peth Conselh Generau d’Aran pendent es darrèri mesi, amassa damb era implicacion deth sector privat, a permetut qu’aguest iuèrn es donades agen estat superiores as des darrèri tempsi

Era Val d’Aran a barrat eth mes de hereuèr damb ues donades d’aucupacion ostalèra jamès vistes enquiara, dera madeisha manèra qu’a passat pendent deseme e gèr.

Aguesta sason d’iuèrn 2021/2022, era aucupacion mieja a estat d’un 67,5%, mès de 10 punts superior ara dera darrèra sason prepandèmia (2019/2020), que siguèc deth 57,3%. En 2018/2019 d’un 54,6% e en 2017/2018 d’un 58,8%. Er iuèrn de 2020/2021, pr’amor dera situacion sanitària e es mesures preventives establides pes autoritats competentes, era aucupacion mieja des mesi de deseme, gèr e hereuèr siguec d’un 18,8%.

Enguan, a estat especiaument bon eth mes de hereuèr, damb ua aucupacion deth 77,4%, fòrça superior ara des ans 2020 (68,6%), 2019 (73%) e 2018 (69%).

“Deth Conselh Generau d’Aran ençà auem amiat a tèrme un trabalh de promocion fòrça important que se ve reflectit enes espectaculars donanades qu’auem obtengut aguesti darrèri mesi” afirmaue eth conselhèr d’Economia, Torisme e Promocion Economica, Juan Antonio Serrano, en tot híger que: “açò, somat as esfòrci e eth bon trabalh de Baqueira Beret e deth sector privat deth nòste territòri, place era Val d’Aran coma ua destinacion toristica de referéncia”.

Actuaument, eth departament de Torisme deth Conselh Generau trabalhe ena activacion deth mercat internacionau a trauès de diuèrsi mieis de comunicacion. Aguestes darrères setmanes e pendent eth mes de març, s’amiarà un trabalh d’acompanhament a jornalistes de granes publicacions d’Alemanha, Brasil, Regne Unit e França.

Atau madeish, eth Conselh Generau d’Aran seguís trabalhant en Plan de Sostenibilitat Toristica qu’a de perméter era adaptacion progressiva deth sector deuant des naui rèptes e besonhs deth territòri per çò que hè ara sostenibilitat e era diversificacion economica.

En aguest sens, era sindica d’Aran, Maria Vergés, a manifestat “qu’aguest ostiu dejà se poderàn visualizar quauques des accions d’aguest plan coma son es naui itineraris en entorn naturau adaptadi entà persones damb discapacitat visuau o era regulacion des accèssi ar entorn naturau entà evitar massificacions enes punts de mès afluéncia”, ath madeish temps, era sindica tanben a volut mostrar er “arregraïment dera maxima institucion ara estacion d’esquí Baqueira Beret que se mantenguec dubèrta pendent eth darrèr iuèrn, en tot perméter qu’ena Val d’Aran se mantenguesse era activitat economica a despièch des dificultats qu’a implicat era situacion sanitària”.