Inaugurat en Portilhon eth monolit en aumenatge as campions espanhòus deth Tour de França.

Er acte presidit peth sindic d’Aran Carlos Barrera, a compdat damb era preséncia de Miguel Induráin, Pedro Delgado, Oscar Pereiro e familhaus de Luís Ocaña.

Er aumenatge s’includís enes actes organizadi peth Conselh Generau d’Aran entara 9au etapa deth Tour 2016, que gesserà de Vielha-Val d’Aran eth 10 de junhsèga.

Vielha, 27 de mai de 2016.- Eth Conselh Generau d’Aran, a rendut aué aumenatge as sèt ciclistes espanhòus guanhadors deth Tour de França, damb era inauguracion en guardader deth Portilhon d’un monolit en reconeishença as hites esportiues des sèt ciclistes guanhadors dera rota francesa, Federico Martín Bahamontes, Luis Ocaña, Pedro Delgado, Miguel Induráin, Oscar Pereiro, Alberto Contador e Carlos Sastre, qu’ath delà dispòsen ja cadun d’eri ua montjòia en cadua des sèt granes corbes deth vessant aranés dera carretèra deth Portilhon, damb eth sòn nòm e era data dera edicion en que se proclamèren guanhadors deth Tour de França.

Er acte presidit peth sindic d’Aran Carlos Barrera, a compdat damb era participacion deth cinc còps guanhadors deth Tour de França, Miguel Induráin, Pedro Delgado, vencedor deth Tour en 1988 e Oscar Pereiro campion ena edicion de 2006, edicion qu’auec ua fin d’etapa en Pla de Beret ena Val d’Aran.

Pendent er acte inaugurau deth monolit des vencedors, eth sindic d’Aran Carlos Barrera, a volut destacar era tradicion ciclista dera Val d’Aran e era sua vinculacion damb eth Tour de França, sustot en Baish Aran, pera connexion que represente eth pòrt deth Portilhon entre era Val d’Aran e França. Eth sindic d’Aran, a soslinhat qu’entà es aficionadi ath ciclisme dera Val d’Aran e entà toti es sòns abitants, poder participar ena organizacion d’ua etapa deth Tour de França ei ua grana satisfaccion, e qu’eth Govèrn d’Aran, vò qu’enes pròplèus ans era Val d’Aran contunhe en tot optar a acuélher quauqua des etapes dera grana rota francesa.

Carlos Barrera, a volut arregraïr era preséncia des campions espanhòus ena Val d’Aran en un dia tan important coma aguest e a agut un arrebrembe especiau entà Federico Martín Bahamontes, prumèr guanhador espanhòu deth Tour de França, que non a pogut assistir ar aumenatge a causa de que sofric un petit accident automobilistic just dies abans. Barrera, tanben a volut hèr ua mencion especiau as familhaus deth desapareishut Luís Ocaña, per voler participar der acte, atau coma d’Alberto Contador e Carlos Sastre que non a pogut assistir ar aumenatge per motius professionaus.

Enes desparières intervencions, es campions espanhòus deth Tour, s’an mostrat fòrça arregraïdi pera reconeishença dera Val d’Aran as sòns assolidatges esportius.

Pedro Delgado, en tot hèr referéncia as sues participacions en Tour de França, a destacat eth pòrt deth Portilhon coma un lòc de termièra, coma eth ciclisme, en lòc de separar, amasse as esportistes e as persones.

Miguel Induráin, a dit senter-se emocionat e estonat, ua causa ei es reconeishences e es arrebrembes, importants entà quinsevolhe esportista que sigue e ua auta fòrça diferenta ei saber qu’en Portilhon des d’aué ua corba a era reconeishença as sòns cinc Tours e un monument que servís ta que s’arrebrembe non sonque as vencedors, mès a toti es ciclistes espanhòus qu’an participat en Tour de França.

Pera sua part, Oscar Pereiro a arrebrembat especiuaments era etapa deth Portilhon deth Tour der an 2006, quan a dit, “baishè en tot plorar per aguestes corbes, dempús d’auer perdut fòrça menutes ena etapa deth dia anterior. En aqueth moment non podie ne imaginar qu’ara fin aguest an serie eth vencedor en Camps Elisis de Paris. Entà Pereiro, eth monolit inaugurat aué, serà ja entà tostemp un lòc de referéncia entà toti es aficionadi ath ciclisme”.

Er acte d’aumenatge as guanhadors espanhòus deth Tour de França, a compdat tanben damb era preséncia deth vicesindic d’Aran, Luís Carlos Medina, José Antonio Boya, conselhèr de Territori e Anna Díaz, conselhèra de Desvolopament Economic e Torisme d’Aran. Ar aumenatge tanben a assistit eth director esportiu deth Tour de França, Thierry Gouvenou.

Er aumenatge as ciclistes a acabat damb ua visita ath parc de fauna Aran Park, a on s’a presentat eth nau microsite Aran Total Bike, restacat ara web de Torisme Val d’Aran. En aguest espaci web, damb 84 seccions en quate idiòmes, se trobarà centralizada tota era informacion sobre BTT, ciclotorisme, DH e enduro, damb rotes de desparièrs nivèus e dificultats, eveniments ciclistes, notícies e enterpreses especializades dera Val d’Aran.

Eth dimenge 5 de junh, se celebrarà ua pedalada populara entà toti es aficionadi ath ciclotorisme, e un concors de diboishi sobre eth Tour de França que participaràn en eth es escolars dera Val d’Aran.

Damb un traçat inedit enquia ara ena istòria dera carrèra, era 9au etapa deth Tour de França 2016 gesserà de Vielha eth pròplèu 10 de junhsèga e aurà un recorregut de 184,5 Km en tot passar per 5 pòrts de montanha. Era etapa aranesa ei ua des escuelhudes entà èster emetuda integralaments en dirècte per television.