Era Val d’Aran establirà era interoperabilitat entre administracions publiques araneses que permeterà qu’en quinsevolh ajuntament que sigue se poguen hèr gestions restacades damb d’auti ajuntaments o damb eth madeish Conselh Generau

Vielha, 21 de deseme de 2018.- Era darrèra reünion der an deth Conselh Consultiu de bailes dera Val d’Aran tractèc entre d’auti ahèrs sus era implantacion dera Administracion electronica enes administracions publiques d’Aran.

Eth sindic d’Aran, Carlos Barrera, expliquèc en finalizar era reünion qu’era implantacion dera Administracion electronica l’an plan resolvuda es ajuntaments grani d’Aran, coma Vielha, Naut Aran, Bossòst e Les, e eth pròpri Conselh Generau d’Aran, mès pas atau es ajuntaments mès petiti e es EMD’S as qu’eth Conselh Generau d’Aran darà eth assessorament e supòrt entara sua adeqüacion. Eth sindic d’Aran, ahigec que, en tot preservar toti es aspèctes dera confidencialitat de donades que mèrque era lei, s’establirà ua interoperabilitat entre es administracions araneses que permeterà qu’en quinsevolh ajuntament que sigue se poderà hèr es gestions restacades damb d’auti ajuntaments o damb eth madeish Conselh Generau.

Ena reünion tanben s’a informat as bailes sus era modificacion dera Ordenança Reguladora dera Gestion de Residus Urbans dera Val d’Aran aprovada iniciauments peth plen deth Conselh Generau d’Aran eth passat 17 de deseme. Ena reünion se demanèc era collaboracion e implicacion des bailes entà hèr complir aguesta ordenança e, sustot, en tractar-se d’ua ordenança que fixe drets e déuers tanti per part des usatgèrs coma dera administracion qu’ei era prestadora deth servici, entà que eth servici artenhe un major nivèu de qualitat. Eth sindic d’Aran, manifestèc qu’era implicacion des ajuntaments tanben a d’anar ena linha de detectar es accions qu’era ordenança preve coma sancionables sus eth mau emplec qu’es usatgèrs poguen hèr deth servici, coma pòt èster depausar residus voluminosi o borses dehòra des contienedors, e qu’es ajuntaments que dispòsen de brigada municipau de neteja s’impliquen ena neteja ath costat des isles de contienedors, atau coma que s’es vigilants municipaus visualizen un mau emplec per part de quauque usatgèr ac comuniquen ath Conselh Generau d’Aran entà iniciar er expedient corresponent.

Fin finau, pendent eth Conselh de bailes, tanben se demanèc enes ajuntaments e EMD’S d’Aran qu’encara non an normalizat eth sòn simbèu locau (Escut), que prenen er acòrd corresponent e li donguen tramit ath Conselh Generau d’Aran entara sua posteriora aprobacion en session plenària. En aguest sentit, eth sindic d’Aran, Carlos Barrera, manifestèc que toti es bailes coïncidissen ena opinion qu’era Lei 1/2015, deth 5 de hereuèr, deth regim especiau d’Aran, abilite ath Conselh Generau d’Aran entara aprobacion des simbèus pròpris e identitaris deth territòri aranés.