Vielha, 20 de març de 2018.- A peticion deth sindic d’Aran, Carlos Barrera, aué a agut lòc en Departament de Territòri e Sostenibilitat dera Generalitat de Catalonha ua reünion entà analisar es prepauses presentades per part deth Ministerio de Fomento sus eth tram dera carretèra N-230 Boca Nòrd deth tunèl de Vielha – Aubèrt, que se tròben en fasa d’informacion publica.

DCIM/100MEDIA/DJI_0847.JPG

Ara reünion a assistit Ricard Font, secretari d’Infrastructures e Mobilitat dera Generalitat, eth director generau, Xavier Flores, tecnics deth grop de Botanica dera UB, deth Laboratòri deth Païsatge dera UdG, tecnics deth Conselh Generau d’Aran, representants dera consultoria Minuartia de connectivitat ecologica e eth baile de Vielha, Juan Antonio Serrano, convidat exprèssaments ara reünion peth sindic d’Aran, Carlos Barrera.

Eth sindic d’Aran a explicat que, dempús d’analisar es prepauses presentades peth Ministerio de Fomento, s’a vist fòrça rapidaments qu’es alternatiues 2, 3, e 4 son absoludaments incompatibles damb er entorn naturau d’Aran e damb es interèssi generaus deth territòri.

Carlos Barrera expliquèc qu’era prepausa deth Ministerio sonque a coma objectiu preservar-se dera responsabilitat que compòrte eth risc deth pas jornalièr de 560 camions en tram Boca Nòrd – Vielha, un tram qu’ath delà, ei eth mès estret de tot eth recorregut dera N-230 des deth tunèl de Vielha enquiara termièra damb França, e que dèishe per resòlver era problematica deth pas dera carretèra enes poblacions d’Aubèrt, Bossòst e Les, sense aparentaments cap intencion per part deth Ministerio d’aportar solucions immediates. Barrera, tanben a dit qu’entà eth ei incompatible mantier dubèrt aguest tram ath transit mentre s’executen es supausades òbres de melhora.

Ath finalizar, era reünion eth sindic d’Aran a afirmat, qu’era Val d’Aran se tròbe deuant dera decision mès importanta des darrèri 70 ans, pr’amor qu’eth dera N-230 ei eth problèma mès grèu qu’afècte ath país.

Pendent era reünion e a peticion deth baile de Vielha, s’a acordat qu’eth Departament de Territòri e Sostenibilitat elaborarà un estudi mès precís sus era prepausa 1 deth Ministèri de Foment per se se podesse hèr quauqua melhora.