Eth passat 23 d’abriu e damb motiu dera diada de Sant Jordi, es alumnes deth PFI- Plan de Transicion ath Trabalh Val d’Aran  visitèren era Residéncia Sant Antòni de Vielha a on regalèren ròses e punts de libres ara gent grana.

Aguesti presents, hèti a man per eri madeishi, destaquèren peth sòn originalitat e creativitat en tot utilizar materiaus, coma papèr, hius, cartons e fotografies.

Es programes de formacion e insercion son volontaris e son dirigidi as joeni que complisquen coma minim 16 ans e coma maxim 21 en an d’inici deth programa, qu’agen deishat era educacion segondària obligatòria (ESO) sense obtier eth títol e que, en moment d’iniciar es programes, non seguisquen estudis en sistèma educatiu ne participen en d’autes accions de formacion.

Era finalitat d’aguesti programes ei proporcionar ad aguesti joeni era possibilitat d’incorporar-se de nau ath sistèma educatiu entà contunhar estudis de formacion professionau. Atau madeish, facilitar er aprendissatge imprescindible entà accedir en mercat de trabalh damb melhores possibilitats d’obtier un emplec qualificat e durable.