Vielha, 3 d’octobre de 2018.- Eth Conselh de bailes dera Val d’Aran aprovèc per unanimitat dar supòrt ara candidatura des Jòcs Olimpics d’Iuèrn Pirenèus-Barcelona pendent era reünion d’ager en Conselh Generau d’Aran.

Eth president dera RFEDI, er aranés May Peus, a peticion deth sindic d’Aran, Carlos Barrera, siguec er encargat d’explicar as bailes eth projècte dera candidatura olimpica d’iuèrn. May Peus, assegurèc qu’es installacions e infrastructures tant esportiues coma de servicis dera Val d’Aran amassa damb es pistes de Baqueira Beret, son preparades entà acuélher es pròves des Jòcs Olimpics en quinsevolh disciplina que sigue, ja sigue esquí aupin, esquí de hons o snowboard. Eth Conselh de bailes dera Val d’Aran harà arribar aguest acòrd unanim de supòrt ara candidatura olimpica Pirenèus-BCN ath Comitat Olimpic Internacionau, ara Secretaria Generau der Espòrt dera Generalitat e ara RFEDI.

D’autra banda, eth Conselh de bailes tanben aprovèc per unanimitat, era installacion de camèras de vidèovigilància en es isles de contienedors entà frenar er abandon de residus voluminosi ena zòna des depòsits. Eth sindic d’Aran, Carlos Barrera, expliquèc qu’aguest tipe de residus se dèishe “indiscriminadament” a on non tòque e quan non tòque e qu’açò perjudicie era qualitat deth servici de recuelhuda de lordères e era imatge dera Val d’Aran. Es bailes acordèren senhalizar totes es isles de contienedors entà informar des dies e es ores de recuelhuda, atau coma dera gratuitat deth servici entàs particulars. Es camèras s’installaràn ena zòna perimetrau de Baqueira e ena zòna deth centre de recuelhuda de Vielha. Eth sindic d’Aran manifestèc qu’era situacion actuau non ei acceptabla e ei totauments insostenibla entath Conselh Generau d’Aran, que destine 200.000 èuros ar an ara gestion de residus voluminosi. En aguest sens eth Conselh de bailes aprovèc qu’era senhalizacion tanben indique eth regim sancionador entàs infractors o incivics que lancen era lordèra dehòra des dies e ores establides. Eth sindic d’Aran expliquèc tanben qu’era Val dispòse de tres espacis entàs voluminosi, en Gessa en Naut Aran, en Vielha e Mijaran en centre de recuelhuda de Beusa e en Bossòst.

Era reünion de bailes tanben aprovèc eth projècte d’actualizacion des Naues Tecnologies en IES d’Aran, mejançant era aportacion economica de 16.000€ per part deth Conselh Generau d’Aran e es ajuntaments, que se somarà as 10.000€ aportadi peth departament d’Ensenhament dera Generalitat entath desvolopament dera informatizacion des aules.

Eth Conselh de bailes tanben acordèc definir quini seràn es pròves esportiues d’interès generau ena Val d’Aran. Atau madeish, pendent era reünion tanben se presentèc era dubertura deth procès participatiu deth Plan estrategic deth Servici Aranés de Salut e Benéster dera Val d’Aran 2018-2023. Eth sindic d’Aran, expliquèc qu’aguest ei ua requeréncia deth departament de Salut dera Generalitat de Catalonha ligat ara melhora deth finançament deth sistèma dera sanitat publica ena Val d’Aran. Eth procès participatiu aurà lòc eth pròplèu dia 9 d’octobre ena Residéncia Sant Antòni de Vielha.

Fin finau, eth Conselh de bailes acordèc qu’es ajuntaments meten a disposicion des ciutadans interessadi, exemplars dera Lei d’Aran que de forma gratuïta poderàn recuélher enes ajuntaments de Salardú, Viella, Bossòst e Les. En cas dera EMD eth repartiment se harà en abitança.