• Eth Plen deth Conselh Generau d’Aran a aprovat aué per unanimitat er autrejament deth Prèmi 17 de junh 2023 as cinc còlhes de dances tradicionaus deth nòste territòri, coma mòstra de reconeishement e arregraïment pera sua aportacion ara cultura populara tradicionau aranesa, peth sòn trabalh intens de recuperacion e transmission deth patrimòni immateriau deth país, qu’a auut coma èish vertebrador era difosion dera lengua pròpria d’Aran a trauès dera musica, e tanben pera sua importanta labor sociau, de coesion e interrelacion.

• Es Prèmis 17 de junh, que prenen caractèr de prèmis nacionaus d’Aran, an era finalitat de reconéisher e arregraïr annauments as persones, collectius o entitats que, pr’amor des sòns merits, an destacat pes servicis prestadi ara Val d’Aran enes diuèrsi encastres dera vida sociau, culturau, esportiva o economica, en tot dignificar es sòns pròpris encastres e aunorar ath país.

Aguest maitin a auut lòc eth Plen Extraordinari deth Conselh Generau d’Aran entà aprovar era proposicion d’acòrd entà autrejar enguan eth Prèmi 17 de junh as cinc còlhes de dances tradicionaus dera Val d’Aran, en reconeishement e arregraïment ara sua aportacion e labor en favor dera Val d’Aran, era sua cultura e era sua ciutadania.

“Era cultura populara tradicionau ei era basa ena que se sostien es sentiments e valors d’un pòble e que trascendíssen e dèishen era sua peada ath long dera istòria. Es dances folcloriques son era manifestacion mès expressiva d’aguesta cultura, en tot constituïr un valuós document dera nòsta istòria e patrimòni”, afirmaue era sindica d’Aran, Maria Vergés, en tot híger que: “pendent decades, es grups de dança tradicionau d’Aran an amiat a tèrme un trabalh intens de recuperacion e transmission de tot aguest patrimòni immateriau a fòrça generacions. Un trabalh que tanben a auut coma èish vertebrador era difosion dera lengua pròpria d’Aran, er aranés, a trauès dera musica, ja sigue en tot recuperar cançons e balhs tradicionaus coma en crear-ne de naui”.

Ath long des ans, coma soslinhaue Vergés, “es dances tradicionaus an desvolopat tanben ua importanta labor sociau, de coesion e interrelacion, per aguest motiu ei de besonh méter tanben en valor eth papèr de dinamizacion qu’es còlhes de dances amien a tèrme en desvolopament deth sòn prètzhèt, en tot transméter valors d’educacion, de conviuença, de tolerància e respècte entre es sòns membres, sustot entre era joenessa, ath temps qu’esdevien un espaci d’escambi e relacion de grana trascendéncia tara nòsta societat”.

Cau rebrembar qu’es Prèmis 17 de junh, que prenen caractèr de prèmis nacionaus d’Aran, an era finalitat de reconéisher e arregraïr annauments as persones, collectius o entitats que, pr’amor des sòns merits, an destacat pes servicis prestadi ara Val d’Aran enes diuèrsi encastres dera vida sociau, culturau, esportiva o economica, en tot dignificar es sòns pròpris encastres e aunorar ath país.

Er autrejament d’aguest guerdon s’amiarà a tèrme pendent er acte institucionau de celebracion dera Hèsta d’Aran eth pròplèu dissabte 17 de junh tàs 13’00 ores en Mijaran.