• Aubèrta serà es pròplèus mesi en un barrat plaçat en ua zòna de bòsc naturau d’uns 5000 mètres quarradi de superfícia, a on se la alimentarà e suenharà en tot seguir un protocòu acordat per consens internacionau entà pr’amor qu’en un futur pogue subervíuer en libertat de manèra autonòma

Es prumèrs resultats des analisis genetics efectuadi ath cadèth trobat eth passat 17 d’abriu en Aubèrt indiquen qu’era orsardeta ei hilha dera ossa Fadeta e de Pyros. Açò vierie a refortilhar er encèrt des mesures prenudes peth Conselh Generau d’Aran es prumèrs dies, atengut que Fadeta s’a localizat ena zòna muntanhosa que va de Vilamòs tà Salient, endrets a on se retornèc ath cadèth es prumèrs dies damb er objectiu que retrobèsse ara mair.

Eth motiu qu’eth cadèth se separèc de Fadeta contunhe estant un mistèri e quinsevolha auta ipotèsi seguís estant pura conjectura. Cau remercar qu’Aubèrta serie frut d’un prumèr part de Fadeta, neishuda eth 2010, e qu’aguesta ei ua mair primairenca e sense experiéncia, e açò apoiridie refortilhar era ipotèsi d’ua separacion accidentau de forma naturau.

Arraïtz des resultats deth laboratòri francés, eth Conselh Generau d’Aran hè ua revision generau des mòstres genetiques obtengudes eth darrèr mes, a fin d’enviar-les a analisar per tal d’obtier bèra naua informacion sus er estat e era ubicacion de Fadeta, era mair deth cadèth.

Era trobalha tanben hè aflorar ua auta problematica, qu’ei era consanguinitat dera poblacion d’ossi pirenencs, donques qu’Aubèrta ei hilha e ath madeish temps arrèhilha de Pyros, atengut qu’aguest ei tanben eth pair de Fadeta. Era ossa Bambú (hilha de Hvala e un mascle esloven) serie era mair de Fadeta, de manèra que Pyros ei er unic mascle reproductor efectiu en Pirenèu. Es auti mascles presents coma Balou, Moonboots o Bonabé (aguesti darrèri tanben hilhs de Pyros) non an participat peth moment en es reproduccions constatades en Pirenèu.

Eth cadèth siguec transportat era setmana passada a un barrat a on s’i serà es pròplèus mesi, plaçat en ua zòna de bòsc naturau d’uns 5000 mètres quarradi de superfícia, a on se la alimentarà e suenharà en tot seguir un protocòu acordat per consens internacionau entà pr’amor qu’en un futur pogue subervíuer en libertat de manèra autonòma.