• Era Val d’Aran a artenhut es melhors donades pendent eth pònt d’octobre dera sua istòria, damb un 85% d’ocupacion que reflectís ua tendéncia ara nauta enes darrèri ans

• Aguestes donades son frut der intens trabalh que, ath long des darrèri ans, eth departament de Torisme deth Conselh Generau d’Aran a amiat a tèrme entà arténher era desestacionalizacion deth territòri

Era Val d’Aran a barrat aguest pònt d’octobre damb ues donades d’ocupacion istoriques en territòri, en tot arténher un 85%, segontes es donades de Foment Torisme Val d’Aran.

“Aran se consolide coma ua destinacion de referéncia mès enlà der iuèrn, atau coma mos demòstren es donades, que confirmen que començam a arténher es objectius de desestacionalizacion deth Departament de Torisme deth Conselh Generau d’Aran”, afirmaue eth conselhèr de Governacion, Innovacion, Economia e Torisme, Amador Marqués, en tot híger que: “aguesti  objectius se higen as deth Plan de Sostenibilitat Toristica, amassa damb d’autes accions, coma eth trabalh entà arténher era distincion de Resèrva dera Biosfèra, entà qu’era Val d’Aran se posicione pendent tot er an en marc d’un torisme responsable e sostenible”.

En darrèr pònt d’octobre, eth de 2021, s’arribèc a ua ocupacion d’un 80,9%. En 2020, un 74,4%. En 2018 era chifra ère d’un 63%.

“Mos demoren fòrça rèptes entà mielhorar era experiéncia toristica, mès credem que vam peth bon camin dempús de fòrça temps compartint damb eth sector eth besonh de trabalhar pera desestacionalizacion toristica d’Aran”, asseguraue eth conselhèr Marqués.

En aguest sens, s’a detectat tanben un aument en percentatge dera ocupacion ath long deth mes de seteme, en tot arribar enguan a un 49%, ua donada fòrça similar ara des ans anteriors (48% en 2022 e 49,7% en 2021) e significativament fòrça mès elevada que de 2019 endarrèr, a on era ocupacion non arribaue ne ath 40% en aguest mes.

Aguestes donades son frut der intens trabalh que, ath long des darrèri ans, Foment Torisme Val d’Aran a amiat a tèrme entà arténher era desestacionalizacion deth territòri a trauès de diuèrses accions de promocion e campanhes tà visibilizar es activitats que se pòden realizar dehòra des sasons d’iuèrn e ostiu.