Eth sindic d’Aran, Carlos Barrera, e eth cap de Cultura, Patrimòni e Politica Lingüistica d’Aran, Jèp de Montoya, damb es alcaldes pedanis de quèrra a drèta setiadi: Juan José Grijalba (EMD d’Arròs e Vila), Alberto Nart (EMD d’Aubèrt), Jesús Ordoñez (EMD de Gausac) e  Jose Rella (EMD de Vilac)

Es Entitats Municipaus Descentralizades de Gausac, Vilac, Aubèrt e Arròs e Vila an cedit ath Conselh Generau d’Aran eth hons documentau que forme part deth patrimòni documentau aranés.

Eth hons documentau a libres, revistes, quadèrns,… sauvadi en 23 caishes.

Entre era documentacion mès rellevanta trapam:

– Libro de actas “Ermita Nuestra Señora de Artiga de Lin”
– Document judiciau de Vilac de 1704 (eth mès antic trapat)
– Convocatòries d’actes publics d’afirmacion patriotica pendent era dictadura de Primo de Rivera, 1924
– Cartes dera Jefatura Provincial de Movimiento e deth Frente de Juventudes
– Agropacion de municipis (1926), fusion de Betlan e Vilac (1968) e era agropacion definitiua de Vielha e Mijaran
– Prumèr veïcul en passar peth Port dera Bonaigua, 1922
– Installacion d’enlumenat public, ans 20
– Installacion dera linha telefonica, ans 20
– Comunicat dera crisi minera ena Val d’Aran, 1927
– Inici des tramits entara construccion deth tunèl de Vielha, 1926

Aguest hons documentau serà depausat en Archiu Generau d’Aran, que poirà hèr reproduccion dera documentacion que considère oportuna e la poderà difóner en entorn web, exposicions e en d’autes activitats de difusion culturau que pogue realizar er archiu en un futur.

En paraules deth cap de Cultura, Patrimòni e Politica Lingüistica d’Aran, Jèp de Montoya “eth Conselh Generau d’Aran depausarà es documents en Archiu Generau d’Aran, tà pr’amor de garantir-ne era conservacion en condicions ambientaus avientes e facilitar-ne er estudi per part des istoriadors que i poguen èster interessadi”.