Damb motiu dera finau dera Copa deth Mon de SBX FIS qu’aurà lòc en Baqueira Beret aguesta pròplèu dimenjada, 19 e 20 de març, es escolans aranesi an pogut saber fòrça mès causes sus aguesta disciplina esportiua.

Damb aguesta accion se vò animar ara participacion des mainatges e des sòns pairs, familhars e amics enes activitats d’animacion qu’auràn lòc en village dera competicion en Plan de Beret aguesta dimenjada.

Eth Conselh Generau d’Aran e eth CAEI (Club Aranés Espòrts Iuèrn) amassa damb eth CEIP Garona, era ZER Val d’Aran e er INS d’Aran an organizat pendent aguesta setmana ues sessions informatives e pedagogiques sus era modalitat deth Snowboard Cross (SBX) damb motiu dera celebracion dera finau dera Copa deth Mon d’aguesta disciplina en Baqueira Beret.

Es escolans dera Val d’Aran an agut era oportunitat de veir un vidèo premanit e dessenhat peth CAEI damb explicacions des tecniques dera practica d’aguest espòrt.

Damb aguesta accion eth Conselh Generau d’Aran, Torisme Val d’Aran, eth CAEI e es escòles dera Val d’Aran vòlen difóner era modalitat, er espòrt e animar ara participacion des mainatges e des sòns pairs, familhars e amics enes activitats d’animacion qu’auràn lòc en village dera competicion en Plan de Beret aguesta dimenjada.

Eth vicesindic d’Aran e conselhèr d’Espòrts, Luis Carlos Medina, a manifestat “eth Conselh Generau d’Aran e Torisme Val d’Aran a trauès deth Departament d’Espòrts d’Aran contactèc e a convidat a toti es clubs d’espòrts d’iuèrn dera Val d’Aran entà hèr-les partícips d’aguesta pròva unica e les facilitarà materiau d’animacion entà crear ambient en village deth Plan de Beret”.

Un Village ena mèta damb fòrça animacion

Entath diuendres d’entrenaments, eth dissabte de classificatòries e es finaus deth dimenge, ei tot dessenhat pr’amor qu’es espectadors que vagen tad eveniment gaudisquen d’ua autentica hèsta. Entad açò s’an preparat diuèrses activitats e animacions paralleles u’auràn lòc en un Village plaçat a pè de pistes en Plan de Beret. Poderàn trobar-se enquia dotze carpes de diferentes mèrques entà mostrar ath public es darrères nauetats en materiau e tanben serà ua excellenta oportunitat entà dar conéisher er inigualable entorn qu’entornege era estacion: era beutat deth païsatge, era riquesa deth patrimòni romanic e es exquisideses dera sua gastronomia, atau coma es multiples e atractiues opcions d’après-ski. Des deth village se divulgaràn es diferentes rotes e lòcs entà visitar e s’aufriràn productes dera marca de garantia Val d’Aran, atau coma ua mòstra des plats tipics dera codina aranesa.

Atau madeish, en tot coïncidir damb era finau dera Copa deth Mon de Snowboard eth dissabte, 19 de març, aurà lòc ua naua edicion d’Era Òlhada en village (Plan de Beret) a on se poderà degustar eth plat mès tradicionau dera Val d’Aran, era òlha aranesa.

E entà méter punt finau ar eveniment, eth dimenge a compdar des 14:30 en Village se celebrarà era hèsta de clausura damb un DJ convidat e fòrça mès suspreses!

Autobusi enquia Beret

Era organizacion deth Campionat deth Mon de SBX meterà servici d’autobusi enquiath Plan de Beret es dies 19 e 20 de març. Eth servici a connexion en Baqueira damb es rotes deth transpòrt intèrn dera Val d’Aran. Oraris:

Dissabte, 19 de març
Baqueira – Beret 8:30 ores
Baqueira – Beret 9:30 ores
Beret – Baqueira 15:00 ores

Dimenge, 20 de març
Baqueira – Beret 10:30 ores
Baqueira – Beret 11:30 ores
Beret – Baqueira 15:00 ores

Vielha, 16 de març de 2016

Conselh Generau d’Aran: Núria Sanjuan