• A trauès dera iniciativa der airau de benèster deth Conselh Generau d’Aran, pendent aguest cors eth professorat d’aguesti centres receberà formacion sus coma actuar dauant des casi de sètge escolar

Pendent es darrères setmanes, era vicesindica e conselhèra d’Igualtat, Salut e Benèster, Maria Vergés, e era conselhèra de Coneishement, Angelina Cases, s’an amassat damb es equips directius des escòles araneses entà implementar-i eth programa KIVA contra eth sètge escolar.

Eth projècte KIVA contra eth sètge cerque trabalhar, non sonque damb era victima e er assatjador, senon que vò hèr a veir ath conjunt der escolanat que toti amassa pòden cambiar aguesta situacion. Ei provat qu’ es observadors an un ròtle clau entà acabar damb eth bullying e pòden decidir èster part dera solucion en compdes d’ignorar eth problèma.

Aguest projècte a estat impulsat per airau de benèster deth Conselh Generau d’Aran pr’amor que s’a detectat que cada còp son mès es casi de sètge enes escòles. Damb motiu dera incorporacion d’aguesti centres formatius ath programa KIVA, pendent aguest cors eth professorat des escòles de Bossòst, Vielha, era ZER Val d’Aran, EAP e er Institut d’Aran receberà formacion sus coma actuar dauant aguesti casi. Era prevision ei qu’era implementacion deth programa s’amie a tèrme eth cors 2020-2021, un viatge acabada era formacion.

Era conselhèra Cases s’a mostrat fòrça “satisfèta per poder implementar  aguest programa en Aran”.

Pera sua part, era conselhèra Vergés afirme que “malerosament Aran non ei alien ad aguesta problematica e pr’amor d’açò eth govèrn deth Conselh Generau d’Aran vò contribuïr a melhorar era situacion enes nòstes escòles”.

Ei de besonh rebrembar que, segontes es donades de Save the Children, era eth sètge escolar afècte a 1 de cada 10 mainatges en España, a on un 9,3% des alumnes a estat victima d’aguesta problematica.