En es Pròves d’Accès ara Universitat de 2019 as que se presentaran es estudiants d’Aran, s’includirà era opcion der aranés enes enonciats der examen d’Istòria

Vielha, 30 de noveme de 2018.- Eth Conselh Generau d’Aran, eth Departament d’Enterpresa e coneishença dera Generalitat de Catalonha e era Universitat de Lhèida an signat un convèni entath desvolopament des Pròves d’Accès ara Universitat (PAU) en aranés.

Er objectiu deth convèni ei regular es activitats qu’amiaràn a tèrme eth Conselh Generau d’Aran, era Administracion dera Generalitat de Catalonha, mejançant eth Departament d’Enterpresa e Coneishença, e era Universitat de Lhèida damb era fin d’includir enes Pròves d’Accès ara Universitat as que s’i presenten es estudiants d’Aran era opcion d’enonciats en lengua occitana, aranés en Aran.

Enes Pròves d’Accès ara Universitat de 2019, s’includirà era opcion der occitan aranés enes enonciats der examen d’Istòria, matèria obligatòria entà tot er alumnat. Es successives convocacions, era Comission de Seguiment designat a compdar der acòrd poderà agranir es matèries en qué s’establisque era opcion d’enonciats en occitan aranés.

Eth Conselh Generau d’Aran designarà es persones qu’amiaràn a tèrme era traduccion ar occitan aranés des enonciats des PAU e assumirà es despenses de traduccion ar aranés des enonciats des pròves que se determinen. Era traduccion se realizarà un còp barrat eth procès de maquetacion e edicion des enonciats en catalan e en castelhan, e es persones encargades dera traduccion auran de seguir eth protocòu de confidencialitat establit ena elaboracion des PAU.

Es còsti d’edicion e d’impression des enonciats der examen en occitan aranés, seràn assumidi pera Generalitat, a trauès deth Conselh Interuniversitari de Catalonha.

Era Universitat de Lhèida serà era encargada de provedir es mecanismes de besonh en cas que calesse era traduccion des responses des examens, entà qu’era sua correccion s’amie a tèrme en igualtat de condicions damb era rèste d’aspirants.

En aguest sentit, cau arrebrembar que Lourdes Bruna, escolana der Institut d’Aran e vesia d’Arties, siguec er an passat era prumèra estudianta qu’arresponec en aranés dus examens dera fase especifica des PAU ena UdL, enes matèries de matematiques e fisica, quan demanèc poder examinar-se en aranés, donques ei lengua oficiau en Catalonha des der an 2006. Maugrat que non ère obligada a hèr es PAU, donques qu’auie corsat eth Batxibac (Bachillerat eth francés), Lourdes Bruna, optèc per hèr era fase especifica entà pujar era sua nòta d’accès ara universitat.

Eth sindic d’Aran Carlos Barrera, ha explicat que damb aguest convèni se barre era demanda istorica deth Conselh Generau d’Aran ara Generalitat de Catalonha entà qu’es estudiants dera Val d’Aran podessen auer era opcion de hèr les Pròves d’Accès ara Universitat en aranés.

Fotos: UdL