• Eth Departament de Cultura, Patrimòni e Politica Lingüística d’Aran redactèc es expedients referents as hèstes deth solstici d’ostiu ena Net de Sant Joan autant de Les coma d’Arties entà éster Patrimòni Immateriau dera Umanitat

Dempús dera amassada qu’auec lòc eth passat dia 9 de hereuèr en Barruera damb es representants deth Ministeri de Cultura, deth Govèrn d’Aragon, dera Generalitat de Catalonha, deth Govèrn d’Andorra, deth Conselh Generau d’Aran, atau coma dera “Associació de Municipis Fallaires del Pirineu”, er expedient entà nomenar Patrimòni Immateriau dera Umanitat es hèstes des Haros d’Arties e Les amassa damb totes des Halhes deth Pirenèu Centrau dejà se trape en Secretariat deth Patrimòni Culturau Immateriau dera UNESCO en París.

Eth Conselh Generau d’Aran a trauèrs deth Departament de Cultura, Patrimòni e Politica Lingüistica d’Aran, redactèc es expedients referents as hèstes deth solstici d’ostiu ena Net de Sant Joan autant de Les coma d’Arties, en tot éster aprovadi per unanimitat peth Plen deth Conselh Generau d’Aran.

Jèp de Montoya, cap de Cultura, Patrimòni, e Politica Lingüistica d’Aran, a manifestat “aguest ei un gran pas, en tot demorar era amassada deth Comitat Qualificador dera UNESCO, qu’aurà lòc en Namibia deth 30 de noveme ath 4 de deseme, entà qu’es hèstes des Haros e des Halhes poguen éster Patrimòni Immateriau dera Umanitat.”

Video dera UNESCO: http://www.unesco.org/culture/ich/index.php?pg=00704&include=film.inc.php&id=32987&width=500&call=film