• Era sindica d’Aran, Maria Vergés, a recebut aguest maitin, ena sedença deth Conselh Generau d’Aran, ath conselhèr d’Empresa e Trebalh dera Generalitat de Catalunya, Miquel Sàmper, e li a trasladat eth besonh de revision des traspassi en matèria economica que demoren obsoleti e que non an estat actualizadi enes darrères decades.

• Atau madeish, eth govèrn d’Aran a exposat ath conselhèr Sàmper era volontat de seguir impulsant es trabalhs e accions tar impuls dera diversificacion economia qu’eth Conselh Generau d’Aran amie a tèrme a trauès deth Hub d’Innovacion Territoriau, HèPic.

Era sindica d’Aran, Maria Vergés, acompanhada deth vicesindic tresau e conselhèr d’Innovacion, Oriol Sala, e deth conselhèr de Torisme e Promocion Economica, Josep Canut, s’an amassat aué damb eth conselhèr d’Empresa e Trebalh dera Generalitat, Miquel Sàmper, entà, entre d’auti ahèrs, hèr-li a arribar eth besonh dera actualizacion dera competéncia en matèria de torisme, que non s’a metut ath dia de 1997 ençà, atau coma tanben eth desvolopament de d’auti traspassi en matèria de promocion economica, qu’an coma objectiu prebotjar era innovacion coma basa dera diversificacion economica dera Val d’Aran.

Entath conselhèr Canut “revisar e actualizar aguest traspàs ei essenciau entà adaptar-lo as besonhs e rèptes actuaus en domèni dera promocion economica, qu’ei deth tot insufisenta o ena dotacion des servicis tecnics de besonh entà garantir ua inspeccion eficienta des empreses toristiques, entre d’auti”.

N’aguest sens, era sindica d’Aran a destacat era oportunitat de méter ath dia qüestions relacionades damb er impuls dera innovacion e dera diversificacion dera aufèrta economica en nòste territòri, “coma un recors clau entà, non solet assegurar un ecosistèma d’empreneduria que permete aguesta diversificacion, se non de retier eth talent que marche d’Aran e ja non torne, en tot descapitalizar eth territòri de persones formades e damb un gran potenciau”, manifestaue Maria Vergés.

Dera man deth conselhèr Sala, eth conseller dera Generalitat a podut conéisher projèctes publics enes qué trabalhe eth govèrn aranés e qu’an a veir damb era Innovacion, com ara BòscAran, Ovihuec, er Airau 5G o er hilat LORA, “quauques des iniciatives que se coordinen deth Hub HèPic ençà, demostrant qu’era Val d’Aran ei capabla d’èster referent n’aguest tipe de projèctes innovadors e damb basa tecnologica”, exposaue eth conselhèr Sala.

Era jornada a acabat damb ua visita ath Coworking gestionat per HèPic, en actiu de 2022 ençà, e  qu’actuauments compde damb 10 places fixes en tot barrar er an 2024 damb mès de 60 sollicituds d’emplec tramitades.

Vielha, 07 d’hereuèr 2025