Vielha, 28 de junh de 2018.- Era Taula de Trabalh Permanent per ua Candidatura Olimpica d’Iuèrn Pirenèus Barcelona a celebrat ua reünion en Musèu Colet de Barcelona damb eth vice-president deth Comitat Olimpic Internacionau (COI), Juan Antonio Samaranch, e damb eth director adjunt d’aguest organisme, Pere Miró, damb era volontat d’escambiar punts de vista sus era aspiracion catalana a organizar uns Jòcs d’Iuèrn. Ena reünion que siguec presidida peth secretari generau der Espòrt dera Generalitat, Gerard Figueras, participèc ua representacion deth Conselh Generau d’Aran.

Pere Miró considerèc “possible” qu’es Pirenèus e Barcelona poguen acuélher uns Jòcs en tot auer en compde es cambis qu’a experimentat era societat enes darrèri ans, tostemp e quan sigue un projècte “de país, de ciutat, qu’age sentit e que pogue servir entà melhorar era societat”. Miró didec qu’era iniciatiua catalana “a sentit pr’amor que restaque era montanha e era ciutat, met Barcelona ath servici deth país e pr’amor qu’es Pirenèus gaudissen aué en dia d’ua nauta projeccion en exterior”.

Pera sua part, Juan Antonio Samaranch detalhèc es principaus aspèctes dera “Agenda 2020”, que se base ena flexibilitat e que poderie beneficiar as aspiracions de Pirenèus Barcelona. Samaranch auancèc qu’an baishat es demandes deth COI e es Federacions Internacionaus as possibles sedences, qu’eth COI assumís bona part deth finançament, ath delà des prètzhèts restacadi ara tecnologia (coma eth ticketing), e que se permet realizar pròves dehòra des sedences entà non bastir naues infrastructures se non s’an de profitar en futur.

Eth vicesindic d’Aran e conselhèr d’Espòrts Luís Carlos Medina declarèc qu’es naui critèris deth COI apròpen era revindicacion istorica dera Val d’Aran de poder acuélher es pròves d’uns Jòcs Olimpics d’Iuèrn. Medina volec arregraïr publicaments eth lideratge dera Generalitat de Catalonha en aguesta possibla candidatura e anoncièc qu’en mes de seteme era Taula de Trabalh Permanent per ua Candidatura Olimpica d’Iuèrn Pirenèus Barcelona visitarà era Val d’Aran entà hèr ua reünion informativa e jornada d’explicacion sus era candidatura.

Eth Comitat Olimpic Español (COE) ja a premanida era carta qu’enviarà ath COI entà sollicitar qu’era Candidatura Barcelona Pirenèus acuelhe es Jòcs Olimpics d’Iuèrn der An 2030.