Eth sindic d’Aran, Carlos Barrera, amassa damb eth director generau de Pompièrs e Proteccion Civila d’Aran, Joan Canalias, e deth director generau de Prevenció, Extinció d’Incendis i Salvaments de Catalonha, Ramón Parés, an presidit es actes de celebracion de Santa Barbara, patrona deth còs des Pompièrs dera Val d’Aran.

Era celebracion a començat damb tòcs de sirènes pes pòbles dera Val d’Aran damb es coches des Pompièrs, ara seguida s’a oficiat era missa ena glèisa de Santa Maria de Mijaran en aunor a Santa Barbara, e s’a sauvat ua menuta de silenci pes Pompièrs defuntadi. En acabar, en parc des Pompièrs de Vielha, es Pompièrs an celebrat eth dia dera sua patrona damb toti es convidadi e damb era rèsta de ciutadans.

Pendent er acte de celebracion eth director generau de Pompièrs e Proteccion Civila, Joan Canalias, a arregraït eth trabalh qu’amien a tèrme jornalièraments es Pompièrs d’Aran, e a arregraït era preséncia de representants des còssi e fòrces de seguretat der Estat, de responsables deth còs de Mossos d’Esquadra e de Pompièrs e Gendarmes der Estat Francés.

Eth director generau de Prevenció, Extinció d’Incendis i Salvaments de Catalunya, Ramón Parés, a anonciat qu’“eth pròplèu an 2015 demoram convocar naues places entà aspirants a Bombers”.

Ena sua intervencion eth sindic d’Aran, Carlos Barrera, maximal representant deth Conselh Generau d’Aran, ath delà d’arregraïr er inestimable trabalh des Pompièrs d’Aran a manifestat “es Pompièrs tostemp son entà garantir tranquillitat e confidança as ciutadans damb ua capacitat de responsa immediata”.

Barrera a ahijut “aguesta legislatura a fòrça estat complicada, mès a nivèu politic està dant es fruts e era projeccion territoriau dera Val d’Aran. En aguest moment, Aran auance mejançant era naua Lei, actuauments en tramit parlamentari, cap a un nau modèl integrau dera responsa e gestion dera Emergéncia”