• Eth GRM des Pompièrs d’Aran a realizat aguesti dies era formacion entà implementar un nau esturment de recerca en montanha, ua campana SAR Recco plaçada en elicoptèr de rescat que, gràcies as reflectors Recco que se trapen en fòrça pèces de vestir o que se pòden aquesir per liure, permet detectar as persones perdudes ena montanha o atrapades per un laueg en un terren fòrça ampli e d’ua forma mès rapida

• Era Val d’Aran ei, a dia d’aué, er unic territòri de tot er Estat e de tot eth Pirenèu en compdar damb aguest esturment

Eth Grop de Rescat en Montanha (GRM) des Pompièrs d’Aran a realizat aguesta setmana era formacion entara implantacion deth nau esturment de recerca en montanha, era campana SAR (search and rescue) Recco.

Era tecnologia Recco permet, per miei d’uns reflectors que se placen ena ròba o complements, trapar as persones perdudes ena montanha o atrapades per un laueg gràcies a uns detectors qu’emeten ua senhau acustica en apropar-se as reflectors per miei dera sua tecnologia de radar auançada.

“Enquiara, compdauem damb detectors Recco mès petiti que mos permetien emplegar-les a pe enes rescats, mès damb era naua campana, qu’anarà plaçada en elicoptèr, dam un saut qualitatiu en nòste servici, en tot perméter realizar era recerca en un terren mès ampli e de forma mès rapida” explicaue eth responsable deth GRM de Pompièrs d’Aran, Juanmi Riu, en tot híger que “aguest esturment poirà èster emplegat auntant pendent er iuèrn, damb lauegi, coma en rescats ena sason d’ostiu”.

Era Val d’Aran ei er unic territòri de tot er Estat e de tot eth Pirenèu en compdar damb aguest esturment. En aguest sens, Riu afirmaue que “èm en procès de contacte damb d’auti grops de rescat deth Pirenèu e Espanha entà meter-mos ara sua disposicion s’auessen de besonh er emplec d’aguesta campana”.

“A compdar d’ara, eth nòste còs de Pompièrs compdarà damb un nau e pionèr esturment que supausarà ua major efectivitat deth sòn inestimable trabalh de rescat en montanha” afirmaue era sindica d’Aran, Maria Vergés.

Cada còp son mès es pèces de ròba o complements coma cascos o cauçat qu’incorpòren es reflectors Recco, mès tanben se pòden aquesir de forma individuau e plaçar-les en morralets o pèces de ròba que non les incorpòren.