Vielha, 20 d’octobre de 2017.- Un an mès era Val d’Aran participe ena grana hèsta deth producte e era gastronomia que se celèbre ena Avenguda dera Catedrau de Barcelona entre eth 20 e eth 22 d’octobre.

“Mercat de Mercats 2017” aumplirà d’aulors, sabors e colors eth centre de Barcelona, damb era preséncia des productors dera Val d’Aran a trauès des productes dera “Marca de Garantia Val d’Aran”

“Mercat de Mercats”, qu’enguan arribe ara 8au edicion, ei ua hèira pensada entà promòir es productes de qualitat e de proximitat que se i pòden trobar productes procedenti de tota Catalonha.

Era Val d’Aran participarà coma collaborador en tot promòir era gastronomia aranesa. Se veneràn es productes deth territòri includit es deth sagèth “Marca de Garantia Val d’Aran”, ath delà de promòir era restauracion e tota era activitat gastronomica que se realize ath long der an laguens e dehòra dera Val d’Aran. Era Escòla d’Ostalaria de Les-Val d’Aran elaborarà diuèrsi plats damb productes dera Marca de garantia, coma per exemple era inigualable Òlha aranesa.

“Mercat de Mercats” includís diuèrses activitats en un unic espaci damb preséncia de productors, comerçants e codinèrs que permet apropar as ciutadans de manèra ludica e pedagogica çò de melhor des productes des mercats, e a on se demore era assisténcia de mès de 260.000 persones.