Es recorreguts dera Val d’Aran by UTMB® ja son oficiaus

agost 30, 2019 Govèrn

  • Torn dera Val d’Aran (VDA), Camins de Hèr (CDH) e Peades dera Aigua (PDA) seràn es tres distàncies d’aguest nau eveniment esportiu qu’aurà lòc en junhsèga de 2020

  • Es inscripcions se dauriràn de forma exclusiva ena web oficiau de Val d’Aran by UTMB® eth 7 d’octubre tàs 12:00 ores

Ager, 29 d’agost, dejà auec lòc era presentacion oficiau dera Val d’Aran by UTMB® en Chamonix, a on sigueren presents, entre d’auti, eth sindic d’Aran, Francés Boya, responsables de Foment Torisme Val d’Aran, Pompièrs d’Aran e InAran Sports.

Era data de celebracion d’aguest eveniment esportiu dejà s’auie anonciat (aurà lòc deth 3 ath 5 de junhsèga de 2020) e ara tanben an gessut ara lum es recorreguts des tres distàncies que conformaràn era Val d’Aran by UTMB®:

Torn dera Val d’Aran (VDA)

Serà era carrèra reina, equivalent ara UTMB®, e darà ua vòlta circulara a tota era Val d’Aran, damb gessuda e arribada en sòn cap-lòc, Vielha.

  • 160km, 10.500m D+, 10.500m D-
  • Gessuda: diuendres 3 de junhsèga de 2020 tàs 18:30 ores en Vielha
  • Prevision prumèr corredor: 22 ores
  • 17 avitualhaments (3 d’eri bases de vida)
  • Toti es finishers obtieràn es Running Stones de besonh entà accedir ara UTMB®, CCC®, TDS® o OCC
  • Maxim 1.500 corredors

Camins de Hèr (CDH)

Equivalent ara CCC® darà gessuda ena Plaça der Haro, en Les, e recorrerà es “darrèri” 101 km dera VDA en tot recórrer lòcs emblematics dera Val d’Aran coma era Val de Toran o eth circ de Colomèrs.

  • 101km, 6.400m D+, 6.100m D-
  • Gessuda: diuendres 3 de junhsèga de 2020 tàs 08:30 ores en Les
  • Prevision prumèr corredor: 12 ores
  • 10 avitualhaments (2 d’eri bases de vida)
  • Toti es finishers obtieràn es Running Stones de besonh entà accedir ara CCC®, TDS® o OCC
  • Maxim 1.400 corredors

Peades dera Aigua (PDA)

Serà era distància mès cuerta e recorrerà era darrèra part deth gran torn ara Val d’Aran. En tot gésser deth Pla de Beret, es corredors passaràn per ua grana quantitat de lacs e arrius as pòrtes deth Parc Nacionau d’Aigüestòrtes e Estanh de Sant Maurici.

  • 55km, 3.100m D+, 3.900m D-
  • Gessuda: dissabte, 4 de junhsèga de 2020 tàs 6:30 ores en Pla de Beret
  • Prevision prumèr corredor: 6 ores
  • 6 avitualhaments
  • Maxim 1.000 corredors

Era Val d’Aran by UTMB® constituís eth nau eveniment creat per UTMB® International, en collaboracion damb InAran Sports e eth supòrt deth Conselh Generau d’Aran.

Serà eth cincau eveniment dera familha UTMB®, higent-se a d’autes destinacions emblematiques: UTMB® Mont-Blanc, Gaoligong by UTMB®, Omán by UTMB® e Ushuaia by UTMB®.

Es inscripcions se dauriràn de forma exclusiva ena web oficiau de Val d’Aran by UTMB® eth 7 d’octubre tàs 12:00 ores. Se mantieràn dubèrtes enquiar 1 de junh 2020 o ben enquia agotar es 4.100 places que s’aufrissen entre totes es distàncies.

Comments are closed.