Vielha, 9 de març de 2017.- Es responsables des Servicis d’Emergéncies, es Pompièrs d’Aran e deth SABS (Servici Aranés de Benèster e Salut), participèren ager en ua amassada internacionau sus medecina de desastres, de com actuar deuant de possibles atemptadi e sus era anticipacion de naui risqui.
Concrètaments, era aportacion des servicis dera Val d’Aran ena amassada, consistic ena presentacion deth Lòc Medicau Auançat d’assisténcia en accidents damb multiples victimes (PMA).
Er espitau de campanha ei dotat de dus Box d’urgéncies (absolutes e relatives), damb ua capacitat de 12 places cadun, amassa damb un veïcul auançat d’emergéncies.
Era preséncia deth Lòc Medicau Auançat e era demostracion que realizèren es Pompièrs d’Aran e eth personau sanitari, desvelhèc er interès des autoritats franceses e internacionaus presents ena amassada.
Dera amassada de Toulouse, destaque ath delà era session internacionau a on s’exposèren es casi des atemptadi de Niça e dera sala Bataclan de París, dera gestion deth multisite en Brusselles en 2016 e era accion des servicis d’emergéncies en atemptat dera maraton de Boston er an 2013, atau coma des sistèmes d’accion deuant menaces quimiques e biologiques.
Eth conselhèr de Territòri, José Antonio Boya, mostrèc era plea disposicion deth Govèrn d’Aran e des servicis sanitaris, d’emergéncies e Pompièrs d’Aran, a collaborar damb es autoritats franceses en ambit sanitari e des emergéncies.
