Foto:ICGC

Es tecnics deth Centre de Lauegi deth Conselh Generau d’Aran participèren agèr dijaus, 17 de noveme, ena XIVau amassada de centres de prediccion des Pirenèus qu’auec lòc en Barcelona, ena sedença der Institut Cartografic e Geologic de Catalonha.

                                           Foto:ICGC

Ena amassada, que se realize biannauments, se tròben eth conjunt de servicis de prediccion de lauegi que publiquen previsions en territòri des Pirenèus. Ath delà des tecnics deth Centre de Lauegi d’Aran e der Institut Cartografic e Geologic de Catalonha, tanben i participèren tecnics dera Agéncia Estatau de Meteorologia (AEMET), de Météo France e deth Servei Meteorològic d’Andòrra. Er objectiu ei mantíer eth contacte entre es organizacions, trabalhar de forma coordinada e establir vincles q’ajuden a mielhorar es tecniques d’observacion e prediccion, d’acòrd damb es estandards recomanadi des dera EAWS (European Avalanche Warning Services), er ens non governamentau qu’amasse toti es servicis de prediccion d’Euròpa.

Enquiath moment actuau, toti es servicis de prediccion des Pirenèus se trapen ara expectativa de naues nheuades que hèsquen de besonh er inici dera emission des bulletins de prediccion de lauegi.

Vielha, 18 de noveme de 2016

Conselh Generau d’Aran: Núria Sanjuan

Hònt: Centre de Lauegi d’Aran

Fotos:ICGC