Eth sindic d’Aran, Carlos Barrera, e eth president des Volentaris d’Aran, Roberto Boya, an signat un an mès eth convèni de collaboracion entà qu’es Volentaris d’Aran organizen era Corsa des 15 pòbles que se celebrarà eth dia 31 d’agost.

En paraules deth sindic d’Aran, Carlos Barrera,“eth compromís deth govèrn aranés ei promòir eveniments esportius ja consolidats qu’ath madeish temps, transmeten valors coma, en aguest cas, era conservacion deth patrimòni. Tot e dispausar de mens recorsi, se darà continuïtat a projèctes coma era Corsa e Caminada des 15 Pòbles”.

Aguest convèni establís qu’es Volentaris d’Aran introdusiràn en totes es comunicacions dera Corsa era marca “Val d’Aran Esséncia des Pirennèus”, er idiòma oficiau serà er aranés e se relacionarà era Corsa damb bèri aspèctes der hèt diferenciau occitan (aranés en Aran), tanben suenharàn entà qu’era participacion aumente en relacion damb es darrères edicions e eth Conselh Generau d’Aran collaborarà ena difusion e balharà supòrt econòmic ara organizacion.

“Des des Volentaris d’Aran volem mantier aguesta corsa pr’amor que consideram qu’ei fòrça important entath país tant a nivèu esportiu coma toristic e patrimoniau” a soslinhat eth president des Volentaris d’Aran, Roberto Boya.

Era Corsa des 15 pòbles, qu’enguan celèbre era sua XVIII edicion, a diuèrses opcions:

– Caminata damb quate opcions de recorrut : 21 km, 16 km, 14 km, e 5 km.
– Carrèra entà adults, en tot combinar ua maraton, e trofèu Roland Giné entàs mainatges 5 km. Gessuda d’Es Bòrdes as 09:00 entàs recorreguts de 21,16, e 14 km, e gessuda de Betlan as 11:00 entath recorregut de 5 km.

“Era Corsa des 15 pòbles potencie eth senderisme ena Val d’Aran, atau coma permet gaudir d’ua rota de trekking combinada damb era visita pes pòbles d’Aran e, degut ara sua elevada participacion, hè difusion dera Val d’Aran e a mès collabore ena desestacionalizacion deth torisme. Atau donques, aguesta corsa a passat a formar part deth patrimòni naturau e istoric dera Val d’Aran” a manifestat Anna Díaz, conselhèra de Torisme, Comèrç e Consum.

Mès informacion e inscripcions: www.corsa15pobles.org.