• Eth Conselh Generau d’Aran, a trauès deth Musèu dera Val d’Aran, presente un documentau entà compréner era istòria de hè 100 ans.

• Era commemoracion aurà lòc dissabte, 14 de deseme, entàs 19 ores, ena glèisa de Mijaran. Se presentarà eth videodocumentau e se poirà gaudir d’ua petita pèça teatrau entà scenificar aguesti eveniments istorics.

Hè cent ans i auec un abans e un dempús entath país. Era luta des aranesi entà arténher milhors comunicacions ei ua constanta ena istòria dera Val d’Aran, mès entath desvolopament industriau, es interèssi sigueren encara majors. Ei per aquerò que gesseren fòrça projèctes entà connectar milhor era Val damb Catalonha e era rèsta d’Espanha, e eth prumèr que s’artenhec siguec eth dera carretèra dera Bonaigua, en 1924. Aguesta naua via la inaugurèc eth monarca Alfons XIII. E aguest se i estèc dus dies, ena Val, perque auie hèt era promessa de visitar es pòbles d’Aran e mostrar interès per inquietuds dera comarca. Aguesta visita reiau representèc era oportunitat des aranesi entà reclamar eth tunèl de Vielha, es òbres deth quau comencèren un an dempús.

Tà explicar aguesti hèts en format de commemoracion serà a compdar d’un documentau, titolat: «1924-2024. Un abans e un dempús des comunicacions en Aran». Eth guion a estat òbra deth Musèu dera Val d’Aran, damb era collaboracion volontària deth senhor Feliu Izard, autor deth libre Trincar eth pòrt e colleccionista de materiau d’archiu. Tanben s’a compdat damb documentacion aportada per Archiu Generau d’Aran e per Airau de Patrimòni, damb es quaus se comencèc a trabalhar en aguest projècte a començaments de 2024. Era filmacion, tractament d’imatges, montatge e postproduccion an anat a cargue d’Albert Naudín, qu’a ua productora pròpria de cinèma de montanha, FilmExplora, e ei director des films Maleïda 1882 e Canigó 1883, sus era dimension excursionista de Jacint Verdaguer, que ja an estat presentadi ena Val d’Aran. Er acte includirà ua pèça teatrau.

Vielha, 09 de deseme 2024