Vielha, 27 de noveme de 2017.- Eth Plen deth Conselh Generau d’Aran a aprovat aué en session extraordinària un pressupòst de 27.559.838,67 € entar exercici 2018. Eth pressupòst s’a aprovat damb es vòts a favor deth Govèrn de CDA-PNA e era abstencion d’UA-PSC e deth PRAG.

Era presentacion deth pressupòst a anat a cargue deth vicesindic d’Aran, Luís Carlos Medina, qu’a explicat qu’eth de 2018 ei un pressupòst continuïsta degut ara situacion politica que se viu en Catalunya. Era aprobacion deth pressupòst ei ua fita tanben importanta ja que s’a pogut barrar abans de començar er exercici deth pròplèu an.

Eth sindic d’Aran, Carlos Barrera, a indicat que frut dera modificacion pressupostària aprovada hè ues setmanes entar an 2018, i a ua part fòrça importanta d’inversion procedenta deth romanent de tresoreria deth pròpri Conselh Generau d’Aran, dera quau era mès significativa ei era de 2 milions d’euros destinats ara construccion dera naua residéncia geriatrica dera Val d’Aran, atau coma 1.200.000 € ara mielhora des accèssi ath miei naturau que vierà cofinançada pera UE e 350.000 € destinats ara mielhora des accèssi a Mont e Montcorbau.

Carlos Barrera, a soslinhat qu’eth pressupòst ei equilibrat entà dar responsa a toti es traspassi de competéncies assolits peth Conselh Generau d’Aran destinant 15.500.000 d’euros entath foncionament de Salut e Benéster, deishant a banda era inversion de 1 milió d’euros entara miehora der airau quirurgic der Espitau dera Val d’Aran. Eth Conselh Generau tanben invertirà 350.000 euros tara estructura de Pompièrs e Emergéncies entar aqueriment de dues naues ambulàncies e dus veïculs de servicis ordinaris d’emergéncies.

Eth Govèrn d’Aran, a soslinhat que li auesse agradat presentar uns pressupòsti damb mès capacitat d’inversion, mès qu’era situacion politica non ac a permetut degut ara situacion politica en Catalunya, damb era aplicacion der article 155 e er empresonament deth Govèrn dera Generalitat, pr’amor que non s’an pogut iniciar es negociacions damb eth Departament d’Economia dera Generalitat entath desvolopament deth nau modèl de finançament deth Conselh Generau d’Aran qu’aurie d’auer èster resolvut enguan entà poder iniciar era sua aplicacion pendent er an 2018. Eth Sindic d’Aran a explicat que s’iniciarà de manèra urgenta era negociacion deth nau modèl de finançament despús des eleccions deth 21-D, un còp s’agen constituït eth Parlament de Catalunya e eth Govèrn dera Generalitat.