Frut des trabalhs de recuperacion e restauracion de pintures prebotjadi peth Conselh Generau d’Aran ena glèisa de Santa Eulària d’Unha (Naut Aran) pendent eth mes de junhsèga e agost d’enguan, ei era descobèrta ena vòuta deth prumèr tram dera nau laterau sud dera glèisa, d’ues pintures renaishentistes de plan nauta qualitat artistica e fòrça ben conservades. Se tracte dera representacion des tres vertuts teologaus (Fè, Esperança e Caritat) e des quate vertuts cardinaus (prudéncia, justícia, fortalesa e temperància), simbolizades per personatges femenins portant es respectius atributs e emmarcades per ua arquitectura de caractèr plan classic tamb colomnes e fronton.
Maugrat era manca d’un estudi apregondit, eth conjunt se pòt datar ena dusau meitat deth sègle XVI o principis deth XVII.

Era existéncia d’ua representacion pictorica des vertuts ena vòuta se coneishie ja des deth 2007, dempús d’ua campanha de restauracion anteriora, Totun era descobèrta a surprenut pera nauta qualitat artistica, eth sòn acusat classicisme e eth bon estat de conservacion.