Frut dera collaboracion entre Bisbat d’Urgelh, Generalitat de Catalonha e Conselh Generau d’Aran son es trabalhs de restauracion ena glèisa de Santa Maria d’Arties, (BCIN), que comenceren en agost de 2007 tamb es cataments arqueologics entà documentar de manèra prealabla er airau a intervier pendent era execucion deth projècte d’assolidament dera cabecèra dera glèisa.

Es trabalhs arqueologics an permut recuperar era fondamentacion dera absida despareishuda e ath delà an metut ara lum es rèstes d’ua glèisa preromanica anteriora e dera muralha der antic castèth qu’entoraue era glèisa, e encara dejós un conjunt de sepultures, que se remonten a prumeries dera nauta edat mieja (s VI-VII), era datacion precisa des quaus la deteminaran es resultats des pròves de C14.

Ath laguens dera glèisa es cataments an localizat tanben sepultures e es gradons deth presbitèri originari.

Dessús dera fonamentacion romanica comence a lheuar-se era naua absida

Era localizacion dera fondamentacion dera absida romanica a permetut qu’eth rebastiment d’aguesta s’age amiat cossent ath traçat e corbatura dera absida originària.

Tanben s’an podut integrar en rebastiment quauqui materiaus constructius originàris recuperadi pendent en cors des cataments e d’auti que se sauvauen ena glèisa (fragments de cornisa, lumedans des hièstres, carrèus, etc).

Era trobalha in situ dera hièstra laterau meridionau en moment d’esbaussar eth mur que demoraue en pè dera antica sacristia, e er hèt de possedir es lumedars originaris des autes dues, a permetut compdar tamb informacion suficienta, entà dotar de manèra fideligna, era naua absida des tres hièstres abituaus romaniques.

Hièstra laterau de meddia descobèrta in situ en esbaussar eth mur dera antica sacristia

Era absida comence a créisher

Entara rèsta de mur s’a emplegat pèira de Sant Beat, plan pariona ara dera marmèra d’Arties, actuaument inactiva, tamb que se bastic era glèisa. Totun, en tractament deth mur, cossent tamb çò qu’establís era normativa entàs intervencions en deth patrimòni culturau, non ei mimetic, en tot diferenciar clarament es elements antics des naui.

Parallèlament, s’a amiat a tèrme er assolidament de tota era façada èst mejançant micropilotatges, en tot restacar-la ara rèsta dera estructura arquitectonica, dejà assolidada en 1999.

En tot bastir era vòuta

Restacant es murs dera cabecèra tamb eth sistèma de micropilotatges

S’a hèt a coincidir era execucion deth projècte d’assolidament dera cabecèra dera glèisa tamb d’autes actuacions de besonh en sòn interior, qu’actuaument son en cors de realizacion: er assolidament e restatauracion des tribunes deth còro e era reorganizacion e pavimentacion der espaci deth presbitèri.

Es trabalhs de restauracion e assolidament des tribunes deth còro