• Era sèrie, impulsada peth govèrn deth Conselh Generau d’Aran dera man de Lleida TV a trauès dera productora Kionalia Project, compde dejà damb dues temporades e cerque prebotjar era normalizacion lingüistica der aranés a trauès dera ficcion e er umor

Era sèrie ‘Èm çò qu’èm’, impulsada peth govèrn deth Conselh Generau d’Aran dera man de Lleida TV a trauès dera productora audiovisuau Kionalia Project, a estat premiada damb eth prèmi Pica d’Estats de Premsa, Ràdio, Television e Internet que convòque eth Patronat de Torisme dera Deputacion de Lhèida ena categoria Mieis de Comunicacion des Tèrres de Lhèida.

“Deth Conselh Generau d’Aran ençà èm plan orgolhosi d’aguest reconeishement a ‘Èm çò qu’èm’, ua apòsta creativa entà impulsar era promocion e normalizacion dera nòsta lengua pròpria a trauès dera ficcion e er umor”, afirmaue era sindica d’Aran, Maria Vergés, en tot híger que “entath govèrn d’Aran, crear aguest producte audiovisuau supause un esturment eficaç entà lutar contra era desaparicion der aranés, pr’amor que consideram indispensable contunhar trabalhant e cercant naues formules entà apropar era lengua as naues generacions”.

Eth passat mes d’octobre ‘Èm çò qu’èm’, siguec finalista tanben as Prèmis de Comunicacion Locau de Catalunya.

Rebrembam que toti es capitols des dues tempsades dera sèrie son disponibles ena web https://lleidatv.alacarta.cat/emcoquem