• Eth Conselh Generau collabòre damb era Associacion de Criadors de Cavall Pirinenc Català dera Val d’Aran damb un convèni entara organizacion d’aguest 16au Concors Nacionau deth Shivau Pirenenc Catalan que s’amiarà a tèrme aguesta dimenjada en Arties.

Dissabte, 16 de noveme, Arties acuelherà era 16au edicion deth Concors Nacionau de Cavall Pirinenc Català, qu’ei eth mès important deth sector equin dera raça pirenenca-catalana que se hè en Catalonha.

Eth Conselh Generau d’Aran e era Associacion de Criadors de Cavall Pirinenc Català dera Val d’Aran an signat un convèni a on eth govèrn aranés collabòre damb era associacion en finançament d’aguest eveniment coma ua accion mès de supòrt ath sector ramadèr d’Aran. Eth govèrn aranés darà supòrt ara organizacion dera activitat damb un totau de dotze mil euros.

Eth Concors Nacionau de Cavall Pirinenc Català ei eth mès important deth sector equin que se hè en Catalonha. Tath conselhèr de Territòri, Paisatge e Cambi Climatic, Francisco Bruna: “damb aguesta aportacion economica, eth govèrn aranés vò méter en valor er esfòrç des ramadèrs deth sector equin d’Aran damb era seleccion des milhors exemplars dera raça Cavall Pirinenc Català en concors Nacionau, pr’amor que s’i amassen es animaus mès avaloradi des diferenti concorsi dera raça des comarques catalanes”.

Entad aguesta edicion entraràn en concors un totau de cent exemplars, des quaus vint e un son de ramadèrs dera Val d’Aran, que competiràn en un totau de sèt categories.

Vielha, 13 de noveme de 2024