Nancy La Fonta de Saintegème a cedit ath Conselh Generau d’Aran eth sòn hons documentau “Baron de Miguel de Santa Gemma de Vilac” que forme part deth patrimòni aranés.

Eth hons archivistic objècte d’aguesta cession serà depausat en Archiu Generau d’Aran tà pr’amor de garantir era melhor gestion e preservacion deth hons documentau.

D’aguest hons se’n harà ua còpia digitalizada e impressa entà depausar-la enes dependéncies dera EMD de Vilac.

Ath delà de documents, en hons “Baron de Miguel de Santa Gemma de Vilac” se i trapen pèces de vaishèra, sagèths der escut dera familha,… que se depositaràn en Musèu dera Val d’Aran.

En paraules deth Cap de Cultura e Patrimòni, Jèp de Montoya, “damb aguest hons, es investigadors poderan contunhar era hita de saber mès dera nòsta istòria. Non voi deishar-me d’agraïr ar alcalde de Vilac, Jose Rella, eth sòn trabalh entà que fin finau, Nancy La Fonta, s’age decidit a cedir ara Val d’Aran aguest hons patrimoniau sus eth Baron de Miguel de Santa Gemma de Vilac”

“Gràcies ad aguest tipe de donacions, agranim eth patrimòni aranés, eth suenh deth Govèrn d’Aran ei encoratjar as vesins a qu’apòrten part dera nòsta istòria” a hijut eth sindic d’Aran, Carlos Barrera.