Pendent aguesta setmana an començat es òbres dera prumèra fase dera reforma der Espitau Val d’Aran que s’estructure en dues parts:

– Ampliament dera planta sosterranh
Ena planta sosterranh s’amplie era zòna de mercaderies enquia arribar en mur que limite eth solar, que se desrocarà en tot arténher ua façada de 14 mètres dauridi ath vessant der arriu Garona e connectada a un nau vial que permeterà er accès de subministraments e era evacuacion de residus.
Er airau agranit ei ua zòna liura damb ua grana dubertura ara façada destinada as veïculs de subministraments e servicis.

– Nau vial
Eth nau vial discorrerà entre eth mur que limite eth solar der Espitau e era escolhera der arriu Garona e conectarà damb er ampliament dera planta deth sosterranh, en tot perméter atau er accès des veïculs de servici, e recuperar es circuits originaus der Espitau.
Era actuacion d’aguesta prumèra fase ei avalorada en 247.000 èuros, damb un termini d’òbres previst de 3 mèsi.
En paraules deth conselhèr de Salut e Benéster d’Aran, Eduardo Valdecantos, “aguestes òbres son de besonh entà optimizar er espaci d’aguestes installacions”, e a assegurat qu’“ei ua prioritat entath Govèrn d’Aran mielhorar es condicions des installacions der Espitau entà poder aufrir un bon servici”.