Eth sindic d’Aran, Carlos Barrera, amassa damb eth rector dera Universitat de Lhèida, Roberto Fernández, e eth baile de Vielha e Mijaran, Álex Moga, an signat un convèni de collaboracion entà pr’amor de desvolopar accions formatives e de capacitacion professionau, de difusion culturau, e de recèrca restacada damb es principaus sectors economics e sociaus que vertèbren era realitat de la Val d’Aran.

Roberto Fernández, ei ath delà er actuau president de totes es universitats publiques de Catalonha (ACUP), membre dera permanenta dera CRUE (Conferencia de Rectores de las Universidades Españolas) e Catedratic d’Istòria e Escrivan especializat en sègle XVIII.

Eth convèni entre eth Conselh Generau d’Aran, era Universitat de Lhèida, e er Ajuntament de Vielha e Mijaran a coma eishi fonamentaus d’accion es següents:

a) Promòir era preséncia d’estudiants de grad e de mastèr en tot realizar practiques academiques en empresa publica e privada e es institucions e administracions dera Val d’Aran e de Vielha e Mijaran. De forma especiau, e coma inici d’aguesta collaboracion, s’impulsarà era realizacion de practiques academiques des grads d’infermeria, sciéncia dera activitat fisica e er espòrt, fisioteràpia, torisme, geografia, administracion e direccion d’empreses, educacion primària e infantila, e estudis de catalan e aranés.

b) Desvolopar activitats de recèrca basica e, mès que mès, aplicada en encastre deth torisme (concrètaments en terren deth torisme de montanha, culturau e patrimoniau, d’esquí, d’espòrts d’aventura, gastronomic, ecologic, e d’identitat), entà pr’amor de contribuïr a assolidar e enfortir es activitats toristiques ena Val d’Aran e en Vielha e Mijaran, en tot aconselhar as administracions territoriaus e as empreses deth sector. Er interlocutor entàs tres institucions signants d’aguest convèni, entà aguesta accion, serà, un còp sigue en foncionament, era Catedra de Torisme d’Interior e de Montanha dera Deputacion de Lhèida-Universitat de Lhèida. Entre es sues accions serà era de constituïr un Observatòri deth Torisme dera Val d’Aran e deth Pirenèu lheidatan, que se plaçarà ena poblacion de Vielha e Mijaran.

c) Impulsar e favorir era coneishença, ensenhament e difusion dera lengua e era literatura aranesa, qu’ei era lengua pròpria e oficiau dera Val d’Aran, segons arreconeish er Estatut d’Autonomia de Catalonha de 2006. Er Interlocutor entàs tres institucions signants d’aguest Convèni entad aguestes accions serà era Catedra d’Estudis Occitans dera Universitat de Lhèida.

d) Promòir activitats que se realizen ena Val d’Aran e en Vielha Mijaran dera Universitat d’Ostiu dera Universitat de Lhèida. Es institucions signants deth present Convèni trabalharàn entà organizar annauments aumens un cors, simpòsium o jornada laguens deth marc dera Universitat d’Ostiu, ath torn de tematiques que siguen d’interès entàs administracions e era economia e era societat aranesa.

e) Apiejar eth desvolopament d’activitats de difusion culturau coma es Aules d’Extension Universitària entà Gent Grana. A partir que se constituïsque en pròpri territòri un nuclèu de ciutadans/nes interessadi a impulsar, organizar, participar e assistir ad aguestes activitats culturaus.

f) Encastre pròpri der Ajuntament de Vielha e Mijaran: Apiejar era creacion dera Taula deth Progrès de Vielha, que permeterà en cap-lòc d’Aran trabalhar e profundizar jos es èishi estrategics que se mèrquen des deth pròpri Ajuntament. Es tres èishi iniciaus a trabalhar seràn: era potenciacion toristica deth municipi; era sostenibilitat; e era internacionalizacion.

En paraules deth sindic d’Aran, Carlos Barrera, “era collaboracion entre eth Conselh Generau d’Aran, era Universitat de Lhèida, e er Ajuntament de Vielha e Mijaran, constituís ua evidenta garantia entà qu’es sinèrgies entre er ensenhament e era recèrca universitària, es accions des administracions territoriaus, e es besonhs de formacion e de coneishença dera societat d’aguesti territòris confluïsquen, entà pr’amor d’assolidar e enfortir eth sòn desvolopament economic, sociau, professionau e culturau”.

Eth Conselh Generau d’Aran, er Ajuntament de Vielha e Mijaran e era Universitat de Lhèida estudiaràn era viabilitat qu’era UdL ne dispòse d’un espaci permanent e adaptat entà pr’amor de facilitar activitats d’orientacion, formacion e difusion restacada damb es èishi prioritaris d’accion enquadrada en present Convèni.

Eth present Convèni a ua vigéncia de quate ans naturaus, en tot prorogar-se automaticaments per periòdes.

Se crearà era Comission de Seguiment deth Convèni que s’amassarà aumens un còp ar an damb era maximala representacion institucionau. Aguesta Comission serà formada per dus representants de cadua des institucions que signen aguest convèni.