Eth Conselh Generau a prebotjat era adequacion e restauracion dera capèla e retaule deth Rosèr de Mont, tamb ua inversion d’apuprètz 40.000 èuros. Autant era bastissa coma eth retaule que se trapauen en fòrça mau estat, daten deth sègle XVIII.

A finaus deth 2006 se determinèc qu’es umiditats que per capillaritat afectauen ara estructura constituïen era principau causa de degradacion d’aguesta e deth retaule e frontau d’autar de husta talhada e policromada d’estil barròc sauvadi laguens.

Pr’amor d’aquerò s’amièc a tèrme un drenatge ath long des murs nòrd e oèst dera capèla.

En 2008, e un còp comprovada era efectivitat dera intervencion, s’encomanèc ara empresa especializada TdART era restauracion deth retaule e frontau qu’ena tardor sigueren trasladadi tà Barcelona.

Mentretant, se procedic ara adequacion interiora dera capèla tamb sanejament e eliminacion deth perbocat de gis existent en murs e vòuta e aplicacion d’un nau perbocat de mortèr de caudia; substitucion deth pavement de hormigon per un de mortèr de caudia, pintura des parets, etc.
Coma mesura preventiva, entà evitar en futur eth risque de transmission d’umiditats s’a bastit un mur leugèrament desseparat dera paret perimetrau a on emparar eth retaule, e supòrts metallics tà sostier eth frontau der autar.

Eth retaule presente quate colomnes salomoniques que desseparen tres carrèrs. Eth centrau, mès ample, acuelhie ua talha dera Mair de Diu deth Rosèr, malurosament desapareishuda e pr’amor d’aquerò, remplaçada per ua fotografia dera madeisha. Eth frontau der autar ei tanben de husta talhada e policromada, d’estil barròc.

Era actuacion en andues òbres a consistit ena desinfeccion e assolidament deth supòrt e era desinfeccion, neteja e assolidament dera cocha pictorica. Es trabalhs que s’an amiat jos era supervision deth Centre de Restauracion de Bens Mòbles dera Generalitat, an sajat de respectar ath maxim era òbra originau, en tot retirar quauqui repintats que desmereishien eth conjunt.