Pendent era darrèra session ordinària der an, eth Plen deth Conselh Generau d’Aran, s’a aprovat per unanimitat era resolucion der expedient d’interpretacion deth contracte de gestion des “Servicis publics regulars de transpòrt intèrn de viatgers e escolar ena Val d’Aran per eish Pontaut-Vielha-Baqueira” ara empresa NEX CONTINENTAL HOLDINGS SLU.

Per unanimitat tanben s’a aprovat eth Convèni d’encargue de gestion de determinats servicis d’assisténcia tecnica informatica pera Diputació de Lleida ath Conselh Generau d’Aran.

Darà supòrt enes airaus:

1. Gestion Tributaria
2. Recaptacion volontaria
3. Registre d’Acòrds
4. Registre d’Entrada e Gessuda
5. Gestion d’Expedients iniciats en Conselh
6. E damb caractèr generau, quinsevolha auta actuacion qu’age de besonh era assisténcia tecnica, en materia informatica.

Eth supòrt tecnic des actuacions anteriores se realizarà mejançant eth lotjament des aplicacions enes sistèmes d’informacion dera Diputació, en tot facilitar, atau, era sua gestion e manteniment per part dera Diputació, e garantint era operativitat des aplicacions entàs darrères finalitats previstes.

Eth Plen a aprovat, e per unanimitat, eth Convèni d’encargue de gestion ara Diputació de Lleida entara contractacion agregada deth subministrament, installacion e metuda en foncionament d’un sistèma d’alèrtes de riuades en cabeçada des cònques idrografiques des comarques dera Alta Ribagorça, Alt Urgell, Pallars Jussà, Pallars Sobirà, Val d’Aran e era Comunautat deth Comun de Saint Beat (França).

En çò que tanh ath Plen Extraordinari, s’a aprovat sollicitar ara Comission Redactora dera naua Lei d’Aran era incorporacion ath redactat dera propòsta de lei que se debat en Parlament de Catalunya des esmenes corresponentes ath finançament, d’acòrd damb eth tèxte articulat amiat a tèrme pera Universitat de Barcelona (UB) a peticion deth Conselh Generau d’Aran.