Eth Sindic d’Aran avalore aguesta incorporacion, que permet que ja siguen 10 es lengües oficiaus disponibles pes usatgèrs
Mès de 41.000 estudiants an utilizat era aplicacion des dera sua creacion, en octobre de 2012
Era aplicacion entà mobiles des Guides de Convèrsa Universitària (GCU) serà disponibla a compdar d’ara en aranés. Era Secretaria d’Universitats e Recèrca dera Generalitat (SUR) a incorporat era lengua d’Aran, qu’ei oficiau en Catalonha d’acòrd damb er Article 6 der Estatut d’Autonomia.
Eth secretari d’Universitats e Recèrca, Antoni Castellà, destaque qu’aguesta incorporacion “refortilhe era vocacion de servici public des Guides e dimensione era lengua aranesa”. Es GCU son ua des aplicacions mès utilizades des qu’a creat eth Govèrn catalan damb mès de 41.000 usatgèrs. Eth sindic d’Aran, Carlos Barrera, considère qu’ “aguesta accion enfortís era possibilitat de coneishença der aranés en encastre universitari catalan e ei un apondi important entara normalizacion sociau de coneishença e usatge dera nòsta lengua”.
En an 1998, era Secretaria d’Universitats e Recèrca creèc es Guides de Convèrsa en collaboracion damb era Universitat de Barcelona (UB), era version impresa e en lengua catalana e anglés, entà facilitar era estada en nòste país des estudiants universitaris estrangèrs e era des catalans que partissen a estudiar dehòra. En octobre de 2012 se’n dessenhèc era aplicacion entà mobiles, gratuïta tant en Google Play coma en AppStore, que dejà a estat descargada des de 41.348 dispositius, majoritàriaments IOS (60%). Era App arrecep ua avaloracion mejana des usatgèrs de 4,1 punts sus un totau de 5.
Des dera sua creacion, es Guides an incorporat versions ara fin d’aufrir servici enes 10 lengües oficiaus disponibles actuauments (catalan, aranés, castelhan, anglés, francés, italian, alemand, portugués, rus e chinés). Parallelament, er estrument ei disponible en version digitau a trauès deth portau Intercat.cat, promoigut peth conjunt des universitats e era Generalitat e qu’arrecuelh un conjunt de recorsi electronics entà apréner era lengua e era cultura catalana.