- Eth Conselh Generau d’Aran, a trauès deth hilat de Musèus dera Val d’Aran, a organizat ua exposicion temporau sus era istòria dera musica en Musèu dera Val d’Aran de Vielha, atau coma un seguit d’activitats relacionades damb aguesta tematica pendent era setmana deth 22 ath 26 de noveme
Damb motiu dera celebracion de Santa Cecilia, eth pròplèu dia 22 de noveme, eth Conselh Generau d’Aran, a trauès der hilat de Musèus dera Val d’Aran, a organizat ua sèria d’activitats damb ua tematica comuna: era musica. Eth projècte, nomentat MUS[ic]EUM. Musicam eth Musèu, nèish damb era intencion de divulgar era cultura, era istòria e er art dera Val d’Aran a trauès dera musica.
Aguest projècte ei centrat en dues accions principaus, per un costat, era setmana deth 22 ath 26 de noveme, s’amiaràn a tèrme activitats diàries entà toti es publics: charrades, visites, talhèrs e concèrts. Entad aguestes accions s’a compdat damb era participacion de nòms plan destacadi ena musicologia coma son Laura de Castellet e Pierre Bouch.
Laura de Castellet amiarà a tèrme es activitats de deluns a dimèrcles. Ath delà des sòns coneishements musicaus, mostrarà es esturments d’epòca medievau qu’apareishen representadi enes nòstes glèises. Es participaires d’aguestes activitats auran tanben era ocasion de saber coma sonen aguesti esturments e conéisher es cants medievaus.
Pera sua part, Pierre Bouch mos aproparà era musica tradicionau des Pirenèus e es sòns esturments, a trauès d’un concèrt damb charrada includida, a cargue deth duet Bourry Rouch.
Era auta accion principau ena que se ten aguest projècte ei ei era exposicion temporau MUS[ic]EUM. Musicam eth Musèu, qu’acuelherà eth Musèu dera Val d’Aran, a on se poiràn trapar contenguts relacionadi damb era istòria dera musica, damb especiau incidéncia enes esturments, es cançons e personatges qu’an mercat era istòria. Aguesta prepausa includirà esturments musicaus deth hons deth pròpri Musèu, pèces que non s’expausen des de hè mès de 30 ans. Aguesta mòstra se poderà visitar gratuïtament dijaus 25 de noveme e se poderà veir en Musèu enquia hereuèr de 2022.
Totes es activitats son de franc e era capacitat ei limitada, sense besonh de resèrva prèvia.