Er IES d’Aran en campionat deth Mon Escolar d’Esquí Aupin

FOTO CAEI: Aingeru Garai.

• 12 esquiadors deth Centre de Tecnificacion dera Val d’Aran anaràn ath campionat en representacion der IES d’Aran, a on corsen es sòns estudis.
• Sierra Nevada acuelherà pendent aguesta setmana, aguest rèpte esportiu, encaminat principauments ar espòrt des mès joeni, es escolars e era peirèra nacionau.

Era Federacion Internacionau d’Espòrt Escolar (ISF) a comunicat qu’aguest campionat preve amassar a 250 persones entre tecnics, delegats e joeni esportistes provenenti de 10 en 15 païsi, principauments europèus.
Cada país poderà presentar un maximal de 4 equipes enes diferentes categories: CAT I (neishudi er eth 1998, 1999 e 2000) e CAT II (1996, 1997 e 1998) entà gojates e gojats. Cada categoria aurà 5 estudiants coma maximom o 3 aumens mès 1 adult.

Es 12 esquidors d’esquí aupin deth Centre de Tecnificacion dera Val d’Aran estúdien en IES d’Aran, e son:

CAT I BOYS:

– Aingeru Garai
– Marc Montes
– Borja Sabugal
– Ramón Barrufet

CAT II BOYS:

– Toni Puig
– Marc Tabernero
– Nil Sellas
– Joan Ureña

CAT II GIRLS:

– Marta Jiménez
– Silvia Vila
– Julia Casanovas
– Barbara Viues

Es representants der IES d’Aran anaràn acompanhadi pera professora Lourdes España e pes entrenadors May Peus, Pep Puyol e Willy Churruarín.

Eth calendari previst entad aguest eveniment de cinc dies, deth 24 ath 29 de març, que se celebrarà pendent eth ua ceremònia d’inauguracion, 2 dies de competicion, damb 2 competicions jornalières. Eth darrèr dia se celebrarà era ceremònia de clausura amassa damb eth liurament de trofèus.

Eth scenari de competicion serà era pista Prado de las Monjas ena Loma de Dilar, pista omologada pera FIS. Es pròves seràn: un eslalom e un eslalom gigant.

Aguest traçat a es següentes caracteristiques:

Eslalom: Gessuda: 2.725m. -Arribada: 2.505m. -Desnivèu: 220m. -Longitud: 725m.

Eslalom Gigant: Gessuda: 2.725m. -Arribada: 2.425m. -Desnivèu: 300m. Longitud: 1.128m.

Luís Carlos Medina, vicesindic d’Aran e conselhèr d’Espòrts, a manifestat “eth gran nombre de joeni que representaràn ar IES d’Aran en Campionat deth Mon Escolar d’esquí aupin, met en evidéncia eth gran trabalh que se realize en Centre de Tecnificacion dera Val d’Aran e gràcies tanben ath supòrt des diferenti clubs d’esquí aranesi, des Federacions e der IES d’Aran”.