• Eth projècte, coordinat des deth Musèu dera Val d’Aran e eth Centre de Lauegi deth Conselh Generau d’Aran, s’a podut amiar a tèrme gràcies as ajudes destinades ara aplicacion deth desvolopament locau participatiu Leader

Eth Conselh Generau d’Aran, a trauès der hilat Musèus Val d’Aran, e gràcies ath finançament deth Consorci Leader Pirineu Occidental, a desvolopat eth projècte “Experiéncia minèra de nauta montanha” ena Mina Victòria, en tot renauir aguesta infraestructura mejançant diuèrses accions.

Aguestes actuacions que s’an desvolopat an coma objectiu, per un costat, era milhora des equipaments e, per un aute, eth foment deth senderisme a trauès de diuèrses rotes a pè practicables pendent tot er an.

Entà fomentar es rotes de senderisme s’an creat es itineraris nomentadi “Es passi des minèrs”, que permeten arribar enquiara Mina Victòria des des pòbles d’Arres e Bossòst, en tot evitar era massificacion de coches en parcatge dera Bassa d’Arres. S’an installat plafons en inici d’aguesti itineraris, s’an hijut pannèus direccionaus e tanben s’a apraiat eth camin de Bossòst enquiara Mina.

Entara milhora des equipaments es energies renovables an jogat un papèr fonamentau damb era installacion de plaques solares ena Sala de Maquines. En aguesta installacion, s’a creat un projècte museografic mès ambiciós, en tot ampliar es contenguts, es lengües o es recorsi didactics, damb era volontat d’èster un petit centre d’interpretacion sus era mineria en Aran.

Es òbres finalizèren eth passat octobre e dejà se pòt gaudir des elements installadi en exterior, tostemp qu’er accés a pistes e condicions meteorologiques ac permeten. Entà visitar era Sala de Maquines calerà demorar enquia junhsèga de 2020, damb er inici dera sason d’ostiu e es guidatges ad aguest equipament.

Eth còst iniciau deth projècte a estat de 40.478,90€, mès eth Consorci Leader Pirineu Occidental n’a finançat un 77,20%. Eth Conselh Generau d’Aran a hèt ua inversion de 13.734,55 € entà corbir es despenes de milhora der equipament.

Era Mina Victòria ei un des equipaments der hilat de Musèus Val d’Aran mès visitadi, donques permet conéisher es sues installacions minères a trauès d’un itinerari de senderisme en un entorn de montanha. Plaçada en pòble d’Arres, aguesta espleita minèra foncionèc pendent tota era prumèra meitat deth s. XX e se consolidèc, gràcies ara sua riquesa en minerau d’esfalerita (sulfur de zinc), coma ua des mines de zinc mès productives de Catalonha.

Era sua dubertura ath public en 2004 permetec poder hèr visites guidades en ostiu, damb eth condicionament dera antiga Sala de Maquines coma centre de visitants e er accés ar interior d’ua des galeries.

Enes darrèri ans, era sua popularitat coma atractiu toristic a creishut considerablement, en tot arribar as 3.000 visitants, ua tendéncia que pòt arribar a incrementar-se damb era  melhora hèta ena pista d’Arres enquiara Bassa d’Arres (punt de parcatge), engodronada eth passat ostiu. A dia d’aué ei era unica mina visitabla en tota era Val d’Aran.