26 mestieraus de diferenti sectors participaràn ena hèira damb era venta de productes locaus
Pendent es diferentes jornades auràn talhèrs e se realizarà ua tòia d’ua cistalha damb productes artesanaus
Vielha acuelherà ua naua edicion dera hèira Hèt a man, hèt aciu, qu’organize eth Conselh Generau d’Aran, e que debanarà es dies 25, 26 e 27 d’agost. Se tracte d’ua hèira que ja s’a assentat pendent er ostiu ena Val d’Aran, damb er objectiu de promòir as mestieraus e es productes locaus.
Enguan era hèira compdarà damb un totau de 26 productors de diferenti sectors: paèrs, veire, ceramica, bijuteria, alimentacion e texila entre uns auti. Ua grana representacion dera produccion artesanau que s’elabòre ena Val d’Aran.
“Hèt a man, hèt aciu, ei ua grana oportunitat pr’amor que tant es aranesi coma es visitants que i a ena Val d’Aran en ostiu, poguen conéisher es diferenti sectors artesanaus dera man des sòns productors, que representen ua activitat importanta laguens deth comèrç locau”, comente era conselhèra de Torisme, Comèrç e Consum, Anna Díaz.
Pendent es diferentes jornades, es visitants ara hèira poderàn apropar-se as estands entà crompar es productes. Ath delà, poderàn gaudir de diferenti talhèrs que s’abilitaràn entà realizar es paèrs tipics dera Val d’Aran, talhèrs de texil e bijuteria, amiadi a tèrme pes madeishi productors.
Ara fin dera hèira se realizarà era tòia d’ua cistalha complèta damb diferenti productes mestieraus des diferenti estands participants. Er orari dera hèira serà de 10h30 a 14h30 e de 16h30 a 21h00 en Passèg dera Libertat de Vielha.
TALHÈRS DE HÈT A MAN, HÈT ACIU
Deluns 25 d’agost:
• 17h30 a 19h00:
Talhèr damb materiau reciclat a cargue de Dwayna artesania
Talhèr de cistalhes a cargue de Paèrs Bausen
Dimars 26 d’agost:
• 11h30 a 13h00:
Talhèr de punt entà adults a cargue de Talhèr textil de Bausen
• 17h30 a 19h00:
Talhèr damb hanga polimerica a cargue d’Alicia Mitjans
Talhèr de pastissaria a cargue de La Guinda
Dimèrcles 27 d’agost:
• 11h30 a 13h00:
Crea eth tòn propi clauèr a cargue de Baobab artesania
• 17h30 a 19h00:
Talhèr de costura a cargue de Tricobebé
Talhèr de cistalhes a cargue de Paèrs Bausen