- Un projècte religat ara milhora dera sostenibilitat centrat en un des sòns programes entà joeni esportistes.
Eth Centre de Tecnificacion d’Espòrts d’Iuèrn (CETEI) deth Conselh Generau d’Aran a estat un des beneficiaris dera convocatòria de bèques autrejades pera Fondacion Spainsnow, impulsada pera Reiau Federacion Espanhòla d’Espòrts d’Iuèrn (RFEDI).
Aguest reconeishement, a trauès d’ua bèca, damb ua dotacion economica de 4.000 €, se destinarà a un projècte orientat a milhorar era eficiéncia energetica e era sostenibilitat des transpòrts qué hèn a servir es joeni esportistes enes programes de pretecnificacion deth CETEI.
- Un projècte innovador entara Val d’Aran
Eth projècte presentat vò minimizar er impacte ambientau des desplaçaments enes espacis d’entrenament e competicion, en tot explorar alternatives de transpòrt compartit, optimizacions logistiques e mesures entà redusïr era dependéncia deth veïcul privat.
Era bèca vò reconéisher eth trabalh deth CETEI en favor d’un modèl de tecnificacion, en tot compaginar era formacion esportiva de naut nivèu damb un compromís reau damb eth miei ambient e eth desvolopament sostengut dera Val d’Aran.
Damb aguest supòrt, eth CETEI reafirme era sua vocacion educadora e transformadora, en tot arténher non sonque un naut rendiment tecnic des esportistes, senon tanben era transmission de valors coma era responsabilitat, era consciéncia ecologica e era igualtat d’oportunitats.
Entà Javier Cavero, conselhèr d’Espòrts deth govèrn aranés: “Aguest reconeishement ei un motiu d’orgulh entara Val d’Aran, e demòstre que volem èster un territòri referent non sonque en espòrts d’iuèrn, senon tanben en innovacion e sostenibilitat”.
- Era Fondacion Spainsnow
Creada en 2024, era Fondacion Spainsnow a coma objectiu promòir es espòrts de nhèu en tot integrar valors coma:
- Era sostenibilitat e eth respècte ath miei ambient,
- Era inclusion e era igualtat de genre,
- Era promocion d’oportunitats entà esportistes en tot eth territòri.
En aguest prumèr torn de bèques, s’an reconeishut 8 esportistes individuaus e 2 entitats. Eth CETEI ei, donc, era unica entitat catalana e pirenenca seleccionada, çò que supause tanben un reconeishement ara trajectòria de collaboracion damb clubs, famílies, Baqueira Beret, Palai de Gèu, INS Aran e es institucions araneses.
Mès informacion: https://rfedi.es/la-fundacion-spainsnow-librara-10-becas-a-deportistas-y-entidades-de-los-deportes-de-nieve
Vielha, 8 d’abriu de 2025